Por E.P. | SANTIAGO DE COMPOSTELA | 10/03/2022 | Actualizada ás 19:03
Representantes da CIG-Administración Autonómica reuníronse este xoves con representantes dos grupos parlamentarios do BNG e do PSOE --e onte co grupo popular-- para demandar o recoñecemento de coeficientes reductores para que o persoal Gardacostas de Galicia poida optar á xubilación anticipada.
A responsable nacional de CIG-Administración Autonómica, Zeltia Burgos, explicou que, aínda que a lei de servizos de Gardacostas é de 2004, este persoal viña desenvolvendo as súas funcións desde o Servizo de Protección de Recursos Mariños. Isto implica que "levan 30 anos, desde o traspaso competencial á Xunta, sen recoñecemento de coeficientes, xa que pasaron do réxime especial do mar ao réxime xeral".
O Servizo de Gardacostas da Xunta de Galicia conta con diferentes escalas de persoal, como a de axentes, executiva, operativa, técnica e de inspectores veterinarios, que "dispoñen de medios para realizar as tarefas de vixilancia, control e salvamento, bases e embarcacións de vixilancia e inspección e mesmo de remolcador e buque de salvamento e tamén helicópteros", apunta a CIG.
Paralelamente, Zeltia Burgos lembrou que Galicia ten competencia exclusiva en materia das súas augas interiores, marisqueo e acuicultura, e que "dada a importancia económica e social" deste sector, defenden "o reforzo do seu persoal e das súas funcións como fundamentais" e rexeitan "a deriva de funcións de competencia autonómica cara a Garda Civil, ou mesmo a Policía Nacional, ambos os corpos e forzas de seguridade do Estado español".
Xunto a isto, a representante da CIG lembrou as condicións xeográficas galegas, con "moitos quilómetros de costa", e a necesidade de levar adiante "as funcións e operativos con coñecemento da xeografía e das peculiaridades de pesca" para operacións de salvamento, control do furtivismo ou mesmo traballos de inspección e salvamento en augas exteriores. Estas circunstancias, dixo, fan necesario "o reforzo deste servizo" para que "Galicia asuma todas as competencias propias con respecto ao mar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.