Ángeles Vázquez e Sogama, premios Dioxina 2021 por "malas accións contra o medio ambiente"

Chega a 21ª edición dos premios Osíxeno e Dioxina de ADEGA. Con eles, a asociación quere subliñar "o mellor e o peor do pasado ano" desde a perspectiva ambiental e ecoloxista.  En positivo, neste ano prémiase en positivo a loita fronte a invasión eólica, o estudo dos ecosistemas fluviais e a vitoria xudicial da Asociación pola Defenda da Ría fronte ENCE. Do lado negativo, destácanse as "malas actitudes e accións contra o medio ambiente galego" por parte da conselleira de Medio Ambiente, Ángeles Vázquez, e de SOGAMA.

PREMIO OSÍXENO DE HONRA 2021

ADEGA concede este premio a Fernando Cobo, profesor titular do departamento de Zooloxía da USC e exdirector da Estación de Hidrobioloxía do Encoro do Con, polo seu "excelente traballo á fronte deste centro de investigación durante máis de 16 anos e a súa constancia no impulso de proxectos e estudos que contribuíron a coñecer máis e mellor os nosos ríos, tanto dentro, como fóra das nosas fronteiras". ADEGA tamén destacar a súa "actitude colaborativa co ecoloxismo galego, ao que ten demostrado o seu apoio en multitude de ocasións, ademais de achegar de forma altruísta asesoramento técnico e datos científicos".

PREMIOS OSÍXENO 2021

Nesta categoría, ADEGA galardoa as mellores actitudes ou actuacións ambientais do pasado ano 2021. En concreto, o Premio Osíxeno individual 2021 vai para Aranza González, presidenta da Asociación Aire Limpo nas Mariñas e secretaria da Comunidade de Montes Veciñais de Monte de Gato, pola súa "actitude resilente e mobilizadora fronte a invasión eólica das Terras do Mandeo e As Mariñas Coruñesas e, en xeral, de todo o rural galego". O Premio Osíxeno colectivo 2021 concédese desta vez á Asociación Para a Defensa da Ría (APDR), que en 2021 conqueriu unha importante vitoria xudicial para o futuro da ría de Pontevedra. 

PREMIOS DIOXINA 2021

Estoutros premios entréganse a persoas e colectivos que protagonizaron as accións ou actitudes "máis nefastas" para o medio ambiente galego durante 2021. ADEGA acordou por unanimidade outorgar o Premio Dioxina Individual 2021 á actual conselleira de Medio Ambiente da Xunta de Galicia, Ángeles Vázquez, "por non respectar os órganos de participación pública e vetar a votación da moratoria eólica no Consello de Medio Ambiente e Desenvolvemento Sostíbel". "Durante 2021, a Conselleira de Medio Ambiente fixo caso omiso das constantes apelacións do ecoloxismo e da sociedade galega en xeral que a instou ampliar a rede de espazos protexidos e a actuar contra as ilegalidades e os abusos das empresas enerxéticas", engade ADEGA.

Por último, a organización concede o Premio Dioxina colectivo 2021 ao Complexo de xestión de residuos de SOGAMA, "por mentirlle descaradamente a sociedade galega sobre os seus avanzos na adaptación á economía circular e á sutentabilidade e constituír un lastre ambiental, económico, histórico e social para o cumprimento dos obxectivos europeos en materia de residuos", di ADEGA.

ACTO DE ENTREGA

Os galardóns serán entregados no decurso da 46ª Asemblea Xeral de ADEGA, o domingo, 27 de marzo, ás 13:30 horas no Pazo da Peregrina de Bertamiráns (Ames).  Neste acto tamén se fará entrega efectiva dos galardóns Osíxeno e Dioxina de 2020, que o ano pasado non puideron ser entregados presencialmente por mor da pandemia da Covid-19.