O PSdeG acusa á Xunta de manter simboloxía franquista logo de que o Goberno se negala a retirala
Paloma Castro responsabiliza á administración autonómica da persistencia de simboloxía "fascista" en distintos puntos do país. Precisamente, o colectivo de presas e presos de Ferrol na ditadura demandara en 2020 ao Goberno que retirara os nomes de militares franquistas do Arsenal da cidade. Defensa negouse.
Por E.P. | SANTIAGO DE COMPOSTELA | 20/03/2022 | Actualizada ás 13:09
A portavoz de Memoria Histórica do Grupo Socialista, Paloma Castro, denunciou o "incumprimento" da lexislación sobre Memoria Histórica por parte da Xunta ao "manter simboloxía fascista en Galicia". Castro pronunciouse así este domingo, tras presentar unha batería de iniciativas no Parlamento de Galicia sobre esta cuestión.
"Non pode ser que 15 anos despois da aprobación da Lei de Memoria Histórica sigan existindo simboloxías fascistas na contorna cando existe unha norma que o prohibe", defendeu. Castro ve "necesario e urxente" o cumprimento do acordo parlamentario de 2008 no que se instaba á Xunta a eliminar "toda simboloxía fascista" e a promover a supresión dos nomes dos edificios que fagan referencia a persoas partidarias da ditadura.
A intervención do grupo socialista chega dous anos despois de que o colectivo de Presos políticos da Ditadura franquista instase ao Ministerio de Defensa desempeñado pola tamén socialista Margarita Robles-- a retirar a simboloxía franquista das rúas do Arsenal Militar de Ferrol. O departamento desempeñado polo PSOE respondeu entón sinalando que non cabía modificación algunha na nomenclatura do recinto ferrolá.
A pesar disto, apuntou a socialista, "moitos símbolos franquistas aínda persisten en fachadas, muros e outros elementos de edificios en Galicia", o que para Castro "deixa entrever o deixamento do Goberno de Feijóo en materia de memoria histórica, que elude a súa responsabilidade sobre esta cuestión".
"Mesmo ten a obrigación legal de controlar, instar e multar a quen manteña esta simboloxía nunha construción privada", insistiu a socialista. Nesta liña, a portavoz instou ao Goberno galego a elaborar un informe técnico onde se relacione toda a simboloxía fascista aínda presente, así como a propiedade dos inmobles "para poder dar cumprimento ao acordo plenario e á lexislación vixente"
A lei, lembra Castro, aprobada en 2007 "buscaba recoñecer e ampliar dereitos e establecer medidas en favor de quen padece a persecución ou a violencia durante a guerra civil e a ditadura". "Ademais dunha obrigación legal, é unha obrigación moral recoñecer a tantas persoas que sufriron a represión", sentenciou.
