O TSXG autoriza ata o 9 de abril a esixencia do certificado Covid en hospitais e residencias
Xustifica que iso permite "manter actividades en situacións nas que se aprecia un incremento de risco de contaxio" pola súa "especial vulnerabilidade"
Por Europa Press / Redacción | SANTIAGO DE COMPOSTELA | 25/03/2022 | Actualizada ás 11:38
O Tribunal Superior de Xustiza de Galicia (TSXG) autorizou este venres á Xunta a prorrogar en toda Galicia, ata o próximo 9 de abril, a obrigación de presentar o certificado Covid de vacinación, recuperación ou proba diagnóstica negativa para visitar aos pacientes ingresados en centros hospitalarios e sociosanitarios residenciais de maiores e de persoas con diversidade funcional.
Así o informou o TSXG nun comunicado, no que indica que a Sección Terceira da Sala do Contencioso-administrativo destaca no auto que esta medida permite "o mantemento desas actividades en situacións nas que se aprecia un incremento de risco de contaxio, polas características de especial vulnerabilidade que concorren".
Ademais, sinala que o feito de que o certificado Covid "non elimine completamente a posibilidade de novos contaxios", non invalida "a idoneidade dunha medida que permite reducir o risco". Por tanto, incide o alto tribunal galego en que o seu obxectivo consiste en diminuír "a posibilidade de que unha persoa infectada contacte con non infectados e non protexidos e que poida transmitirlles a infección".
Ademais, asegura que está acompañada "dun esforzo da administración sanitaria no campo da vacinación, no da expedición de certificados e no aumento de probas para a detección do virus, destacándose que todos os que quixeron vacinarse, puideron facelo".
"TEMPO IMPRESCINDIBLE"
Na resolución, os maxistrados sinalan que o informe médico achegado pola Xunta xustifica a obrigación de presentar o certificado Covid en determinados espazos.
Ademais, indican os maxistrados que a medida "se manterá o tempo imprescindible para mellorar a situación epidemiolóxica galega, que se revisa diariamente e sométese semanalmente á consideración do comité clínico, segundo as evidencias científicas que poden ir xurdindo". A vixente autorización abarca ata as 00,00 horas do 9 de abril, no inicio da Semana Santa.
