Galicia recibe primeiras doses do Paxlovid, un novo antiviral contra a Covid-19

Galicia recibirá este luns as primeiras doses do antiviral Paxlovid contra a Covid-19, que chegarán aos hospitais de Santiago de Compostela, Ferrol e Vigo. Así o informou a Consellería de Sanidade nun comunicado, no que indicou que posteriormente se enviarán ao resto de hospitais de Galicia esas doses da remesa do Ministerio de Sanidade co seis por cento dos primeiros 11.900 tratamentos do antiviral Paxlovid que se distribuirán en España.

Sanidade sinalou que está previsto que o Ministerio de Sanidade faga novos envíos nas próximas semanas ata completar a cifra de 50.000 tratamentos para o conxunto do Estado no primeiro trimestre do ano. A Consellería de Sanidade explica que Paxlovid constitúe un medicamento que se fornecerá baixo prescrición médica e se administrará por vía oral, polo que "posibilita un tratamento ambulatorio dos pacientes leves con factores de risco para progresión a Covid grave", que controla a progresión da infección e "frea a hospitalización e morte", engade.

Respecto diso, Sanidade destaca que Paxlovid "debe administrarse canto antes tras o diagnóstico de covid e dentro dos cinco días posteriores ao comezo dos síntomas". Por tanto, subliña a Administración sanitaria que este novo fármaco se engade ás vacinas e a outros medicamentos "para evitar que pacientes positivos con determinados condicionantes poidan evolucionar a un estadío grave da enfermidade".

E lembra que a Comisión Permanente de Farmacia do Sistema Nacional de Saúde acordou que a indicación e prescrición de Paxlovid será realizada polo profesional médico que efectúe o diagnóstico, tanto do ámbito de primaria como hospitalaria.

Caixa do medicamento Paxlovid, de Pfizer, contra a covid-19.