Santiago rehabilitará os pavillóns deportivos de Vite e Santa Isabel

O Concello de Santiago presentou ao 'Programa de Impulso á Rehabilitación de Edificios Públicos (PIREP) Local - Liña 1 - 2022" do Goberno Central dous novos proxectos: a rehabilitación do Complexo de Santa Isabel e do Polideportivo de Vite. Así o anunciou este venres o alcalde compostelán, Xosé Sánchez Bugallo, que detallou que para Santa Isabel o investimento previsto é de 2.975.000 euros, dos cales solicitan algo máis de dous millóns de euros de axuda e o concello achegaría 604.000 euros.

A obra consistirá nun cambio de fachada, da cuberta, instalacións eléctricas, iluminación, carpintaría, duchas, así como a instalación de prevención de incendios e de reforzo da estrutura de madeira da piscina. No caso do polideportivo de Vite, Bugallo concretou que se cambiaría a súa imaxe, toda a cuberta exterior ou as instalacións de luz e auga, por un importe de 1.325.276 euros, dos cales solicitan ao Ministerio 979.000 euros e o Concello achegaría 345.000 euros.

En todo caso, o rexedor compostelán sinalou que, aínda que as solicitudes están presentadas e cumpren os requisitos, non poden garantir que se lles outorguen as dúas peticións ou a totalidade do importe solicitado. Así, trasladou que estes fondos suman 250 millóns de euros para toda España, polo que indicou que van esperar a ver que obteñen nesta convocatoria e xa preparan a seguinte, que sería para o 9 de xuño.

O alcalde explicou que o investimento mínimo ten que ser de medio millón de euros e, por iso, elixiron "instalacións públicas con gran uso e demanda". Ademais, detallou que a estes fondos só poden concorrer edificios de titularidade pública construídos con anterioridade ao ano 2009 e a corporación debe asumir a obrigación de que sigan sendo de titularidade pública polo menos durante os próximos 20 anos.

CENTRO DO MEIXONFRÍO

Por outro lado, Sánchez Bugallo ve "complicado" cambiar a localización do centro de distribución de mercadorías planeado. Sobre unha localización alternativa a Meixonfrío, o rexedor santiagués advertiu que "é moi complicado cambiar o emprazamento" porque no BOE publicado o 26 de abril amplíase o prazo de presentación do procedemento, pero "especifícase un límite" e agora o consistorio debe iniciar o procedemento de contratación do 80% do importe antes do 15 de xuño. Ante esta circunstancia, Bugallo explicou que para "calquera outra localización" que se elixa habería "moitas actuacións previas que facer".

"O BOE que todos esperabamos que nos trouxese unha ampliación de prazo, pero sen cambiar as condicións, resultou que co cambio de condicións en realidade o que fai é apertarnos moito máis", contextualizou.

Así, detallou que a parcela de Meixonfrío xa ten redactado o estudo ambiental, a súa exposición ao público e mesmo o plan especial para a súa tramitación en canto apróbese o estudo ambiental. Por iso, apuntou que "calquera outro emprazamento" tería que "empezar de cero". "Iso é un tema importante a valorar por parte de todos os grupos", subliñou.