Un 5% dos adultos e un 7% da poboación infantil galega ten asma

A asma representa unha enfermidade crónica que afecta en Galicia a un cinco por cento dos adultos e a un 7% da poboación infantil, á vez que representa "un exemplo de cronicidade" en cidadáns novos. Esta patoloxía xera un consumo "moi importante" de recursos humanos e materiais. Así o informaron diferentes áreas sanitarias galegas con motivo da celebración este martes, 3 de maio, do Día Mundial da Asma, que este ano ten como lema 'Pecha a porta ao mal control da túa asma".

Segundo datos da Administración sanitaria galega, o 60 por cento dos asmáticos adultos presenta polo menos unha enfermidade concomitante e un 12% deles padece tres ou máis.

Pola súa banda, a asma infantil afecta a case o sete por cento da poboación e representa un exemplo de cronicidade en poboación nova. Ademais, as mesmas fontes indicaron que o 36% dos pacientes con asma teñen un "mal control" da súa enfermidade e un 34,1% adicional presentan "asma parcialmente controlada".

Respecto diso, din que os pacientes mal controlados teñen "peor calidade de vida relacionada coa saúde e producen maior consumo de recursos sanitarios, triplicando o custo medio por paciente".

Por iso, resaltan que o cambio da atención sanitaria destes pacientes seguidos en Unidades de Asma xerou "unha melloría asistencial, reducindo notablemente os custos económicos".