A Coruña acollerá un 'encontro de alcaldesas' con Ana Pastor e Carmen Blanco

A Coruña acollerá o 19 de maio un 'Encontro de alcaldesas' co obxectivo de reflexionar sobre a presenza da muller en postos de responsabilidade desde a perspectiva local, segundo anunciou a alcaldesa herculina, Inés Rey. O acto contará coa presenza doutras representantes políticas como a ministra de Política Territorial e portavoz do Goberno, Isabel Rodríguez.

En rolda de prensa, tras a Xunta de Goberno local, a rexedora destacou que neste ámbito "queda moito por percorrer" e lembrou que as mulleres alcaldesas "non chegan" ao 22% en España. "Como primeira muller alcaldesa da democracia na cidade da Coruña", asegurou que é a súa "obrigación e responsabilidade" visibilizar o "liderado feminino" e "seguir impulsando" unha maior presenza de mulleres "en todos os ámbitos da sociedade, nos foros de debate e na vida pública".

Nesta xornada participarán alcaldesas de cidades de máis de 200.000 habitantes, como Xixón, Hospitalet, Cartaxena ou Sabadell, que darán a coñecer a súa experiencia, compartirán obxectivos comúns e retos de futuro. Ademais, estarán no evento "outras mulleres relevantes na toma de decisións a nivel nacional" como a ministra de Política Territorial e portavoz do Goberno, Isabel Rodríguez; a vicepresidenta segunda do Congreso, Ana Pastor, e a presidenta da Comisión de Igualdade no Congreso na actualidade e exvicepresidenta do Goberno, Carmen Calvo. Inés Rey resaltou que este encontro terá unha "perspectiva plural", en canto a que as invitadas pertencen a formacións políticas diferentes.

A alcaldesa da Coruña, Inés Rey, ofrece unha rolda de prensa tras a Xunta de Goberno. CONCELLO DA CORUÑA