Dúas traballadoras peregrinan ata Santiago polos dereitos do persoal eventual do Sergas

Dúas das integrantes do sindicato PROSAGAP iniciaron o pasado sábado, 14 de maio, unha peregrinación dende o Cebreiro que ten como obxectivo "denunciar a situación de precariedade e malestar na que se atopa o persoal eventual da Sanidade Pública Galega", explican nun comunicado. A andaina finalizará este próximo sábado 21 co acompañamento doutras persoas afiliadas durante a última etapa do Camiño.

Dende PROSAGAP afirman que esta protesta rematará "unha vez que as nosas reivindicacións cheguen a Santiago, logo de ter percorrido Galicia con elas". Estas demandas, que levan escritas dentro de cunchas de vieira, foron comunicándose polo sindicato ao longo de toda a semana a través das súas redes sociais. 

Unha das máis sinaladas, de acordo cas promotoras da acción, é a da cuestión da carreira profesional. "Un complemento salarial que premiaría a lealdade ao sistema e a dispoñibilidade dos e das profesionais, e que lle ten sido inxustamente negado ao persoal eventual, o que provocou diversas denuncias que, recentemente, deron a razón xudicial ao sindicato".

Como colofón do Camiño, espérase que un grupo de persoas afiliadas ou simpatizantes

do sindicato reciban as dúas mulleres que saíron do Cebreiro na súa chegada a Compostela, na mañá do próximo sábado 21, e as acompañen na entrega das reivindicacións na Praza do Obradoiro.

O razonable sería que, cando unha persoa se xubila, se sacase por OPE a súa praza para ser ocupada por outra profesional. O que acontece, pola contra, é que só unha porcentaxe destas prazas sae a oposición, deixando o resto para ser cubertas por eventuais con contratos peores 👇 pic.twitter.com/0uwHNrR2Ch

— SINDICATO PROSAGAP (@prosagap) May 19, 2022