Entregado o XVIII Premio Literatura Pura e Dora Vázquez ao escritor Pablo Nogueira e a ilustradora Eva Piay
O Premio Pura e Dora Vázquez, que convoca anualmente a Deputación de Ourense, está dotado con 1.500 euros para cada modalidade --narrativa e ilustración-- e ten como obxectivo fomentar a lectura no público máis novo, así como recoñecer o traballo de autores literatios e artísticos.
Por E.P. | OURENSE | 20/05/2022 | Actualizada ás 20:18
O escritor Pablo Nogueira (O Carballiño, 1987) e a ilustradora Eva Piay (Rubiá, 1999), ambos os ourensáns, recolleron este venres o XVIII Premio de Literatura Infantil e Xuvenil Pura e Dora Vázquez polo libro 'O clube de coleccionistas de selos'.
O acto de entrega celebrouse no Colexio Virxe da Saleta de San Cristovo de Cea e, á parte dos galardoados, asistiron o alcalde do municipio, José Luís Valladares; o vicepresidente primeiro da Deputación de Ourense, Rosendo Fernández; e a responsable de Cultura e Producións Audiovisuais desta mesma institución, que ademais exercía de presidenta do xurado do certame, Patricia Torres, entre outros.
Nogueira, autor do libro, recibiu unha ovación no seu colexio de Cea por máis dun centenar de alumnos presentes no acto. Na súa intervención, explicou que en 'O clube de coleccionistas de selos' tratou de articular unha historia onde "a inclusión, a diversidade e a diferenza cobrasen unha gran importancia", no que foi fundamental o labor pictórico de Piay, que se presentou ao certame co pseudónimo 'Auga doce'.
O Premio Pura e Dora Vázquez, que convoca anualmente a Deputación de Ourense, está dotado con 1.500 euros para cada modalidade --narrativa e ilustración-- e ten como obxectivo fomentar a lectura no público máis novo, así como recoñecer o traballo de autores literatios e artísticos.
O vicepresidente primeiro provincial destacou que este acto se celebrase "dous días despois" de que a xunta de goberno da Deputación aprobase presentar a candidatura das irmás Pura e Doura Vázquez ás Letras Galegas de 2023. "Situamos o nome das autoras e autores contemporáneos á beira de dous xigantes das nosas letras", explicou Rosendo Fernández.
