O novo líder do PSOE, Pedro Sánchez, arrasa en Galicia
O novo líder socialista case triplica os resultados de Eduardo Madina. José Ramón Besteiro amósase “moi contento” polo resultado.
Por Galicia Confidencial | Compostela | 14/07/2014 | Actualizada ás 13:15
Pedro Sánchez, o novo secretario xeral do PSOE arrasou en Galicia. Obtivo 1.008 votos; 600 máis que Eduardo Madina, que sacou 391 e de Pérez Tapias, que tivo 136. Uns resultados que non se entenden pola masiva simpatía que espertou Sánchez entre os militantes galegos.
De feito, Sánchez era o candidato do líder socialista, José Ramón Besteiro, e de todo o seu equipo. Tamén era o candidato da maior parte do PSOE de Pontevedra e de parte do PSOE da Coruña.
E é que o aparello socialista galego envorcouse con el, mentres que o sector de Pachi Vázquez en Ourense e certos militantes e dirixentes da Coruña –os enfrontados á dirección actual-- decantáronse por Eudardo Madina. De feito, unha parte dos militantes socialistas galegos estenderon a idea de que, se o vasco gañaba, Laura Seara, a man dereita do ex secretario xeral do PSdeG en Galicia, sería a súa secretaria de Organización. A súa intención era mobilizar o voto en contra de Madina.
O propio Sánchez, na súa visita a Galicia, aloxouse en casas de destacados militantes, moitos deles, dos críticos coa xestión de Pachi Vázquez cando era líder do PSdeG. Por iso, e a pesares de que non había un apoio oficial, a súa vitoria foi moi celebrada en determinados sectores do socialismo galego.
Besteiro, “moi contento”
Por iso, este mesmo luns, José Ramón Gómez Besteiro, confesouse “moi contento” e aínda que dixo que “non é ou momento” de falar da futura executiva do partido, reivindicou para Galicia un lugar no novo aparello. “Dende aquí tamén apoiaremos o proxecto e tamén insistiremos para que Galicia estea presente”, dixo.
Neste sentido, apostou porque o cónclave que se celebrará en dúas semanas sexa o do “congreso da unidade” e convidou a outros partidos a adoptalo. “Isto non ten volta atrás”, dixo ao tempo que felicitou a todos os participantes neste proceso; Sánchez, Madina e José Antonio Pérez Tapias.
