O BNG pide ao Goberno garantir un sistema ferroviario "accesible e adaptado" a Galicia

O deputado do BNG no Congreso, Néstor Rego, reclamou ao Goberno que manteña os bonos e garanta un sistema de transporte ferroviario "accesible e adaptado á realidade galega". A formación nacionalista esixe ao Goberno cumprir os compromisos alcanzados co BNG e mellorar o servizo ferroviario na Galicia con máis frecuencias e máis liñas, así como axilizar a implantación as proximidades ferroviarias.

Rego advirte da "inxustificable incerteza" xerada polo Ministerio ao anunciar o fin da vixencia dos bonos gratuítos sen presentar alternativas para os miles de usuarios que empregan o tren a diario en Galicia. "Os bonos gratuítos demostraron ser unha medida eficaz para fomentar o uso do tren, retirar vehículos das estradas e contribuír á loita contra o cambio climático. O Goberno non pode deixar sen resposta ás persoas que dependen deste medio de transporte" sinala.

O deputado nacionalista reclama que se manteñan as bonificacións actuais ata finais de ano, mentres non se implanta un novo modelo, e propón unha fórmula mixta: gratuidade para colectivos vulnerables, estudantes, persoas xubiladas ou viaxeiros recorrentes, e tarifas competitivas para o resto da poboación. Así mesmo, o BNG denuncia a falta de frecuencias e prazas suficientes nos servizos ferroviarios na Galicia, en especial no Eixo Atlántico, nas horas de maior demanda, tanto de mañá como de tarde.

"É ilóxico pretender fomentar o uso do tren se despois non hai trens nin horarios acomodados para ir traballar ou estudar", critica Rego, que instou ao Ministerio a reforzar os servizos e cumprir os compromisos asumidos no Acordo de Investidura coa implantación de proximidade ferroviarias no país.

FACUA PIDE A RENFE QUE ACABE COA "DISCRIMINACIÓN"

FACUA Galicia remitiu un escrito a Renfe no que lle pide que poña fin á "discriminación" que sofren os usuarios galegos con respecto a outros territorios do país á hora de adquirir os billetes de tren con certa antelación.

A asociación explica nun comunicado que comprobaron que a páxina web de Renfe non permite a compra de billetes a longo prazo en traxectos que parten desde esta comunidade autónoma, a diferenza doutros territorios onde os pasaxeiros poden xa obter os seus billetes para trens previstos a finais de ano. No caso de Galicia, a data máxima na que se permite dita compra é a dúas ou tres meses vista, mentres que para viaxes por exemplo Sevilla-Madrid ou Valencia-Madrid poden adquirirse xa para os meses de outubro ou novembro.

O BNG DE VIGO SOLICITA MELLORAS NOS TRANSPORTES

O BNG de Vigo esixiu ao alcalde, Abel Caballero, que reclame ao Ministerio de Transportes e Mobilidade Sustentable o mantemento das bonificacións e viaxes gratuítas nos servizos ferroviarios de media distancia, así como os descontos no transporte urbano por autobús. Nun comunicado, os nacionalistas reivindicaron que manter os abonos gratuítos de tren é unha "necesidade básica e esencial" para os vigueses para garantir un transporte público "accesible". "Non é aceptable que se eliminen estas bonificacións sen ofrecer alternativas que aseguren unha mobilidade xusta e sustentable", remarcou o portavoz local do Bloque, Xabier Pérez Igrexas.