Descobren un 'aliado' do mexillón de río, unha das especies máis ameazadas do planeta
Trátase do salmón atlántico. É a conclusión á que chega un estudo desenvolvido na Universidade de Santiago de Compostela.
Por Europa Press / Redacción | SANTIAGO DE COMPOSTELA | 24/05/2022 | Actualizada ás 18:49
O mexillón de río, especie en perigo de extinción, ten no salmón atlántico un 'aliado' para garantir a súa supervivencia, segundo revela un estudo desenvolvido na Universidade de Santiago de Compostela (USC).
A investigación forma parte da tese doutoral de Pedro A. Castrillo Arias na Facultade de Veterinaria do Campus Terra da USC, con sede en Lugo. O obxectivo era indagar nas solucións para o cultivo dunha especie de mexillón de río que está en perigo de extinción.
Así, o estudo logrou caracterizar a interacción parasitaria entre as larvas do molusco e o salmón atlántico como hóspede, ademais de resultar de axuda para comprender esta fase larvaria e para analizar o efecto desta parasitación sobre a saúde do salmón.
Os mexillóns de río están considerados "enxeñeiros" do ecosistema e son capaces de filtrar ata 40 litros de auga ao día. A pesar disto, son uns dos grupos zoolóxicos máis ameazados do planeta.
