A metade dos establecementos que celebran vodas en Galicia non están rexistrados pola Xunta
Ascega reclama que as administracións fagan cumprir a lexislación.
Por E.P. | SANTIAGO DE COMPOSTELA | 09/06/2022 | Actualizada ás 12:35
A metade dos establecementos que celebran vodas en Galicia non están rexistrados pola Xunta, segundo un estudo da Asociación de Emprendedores de Galicia (Ascega), que cualifica esta situación de "competencial desleal" para os establecementos que cumpren "escrupulosamente" os requisitos.
Así o apuntou Roxelio López, vogal do grupo de Locais Organizadores de Vodas e Eventos de Ascega, nunha rolda de prensa para presentar un informe elaborado por esta asociación sobre esta cuestión. Nel denúnciase que máis da metade non están inscritos no Rexistro de Empresas de Actividades Turísticas da Xunta, un requisito, apuntou, imprescindible para albergar este tipo de eventos.
O informe confronta os establecementos que aparecen nas dúas páxinas web máis consultadas polas parellas que casan en Galicia e a listaxe publicada en febreiro pola Dirección Xeral de Turismo.
Do total de 337 lugares publicitados nos dous portais, o 53% non está censado no rexistro autonómico, de acordo cos datos achegados por Ascega, desde a que aseguran que para entrar a formar parte del os propietarios deste tipo de restaurantes deben ter licenza de obra e só con ambos os trámites poden contar cun seguro que cubra as parellas e as persoas invitadas.
Por provincias, A Coruña é a que máis cumpre, co 45% dos establecementos non rexistrados, e Pontevedra a que menos, co 70% de empresas non censadas en Turismo. No caso de empresas de catering, o informe apunta que, do total de 73 anunciados nos dous portais de internet, o 86% non están inscritos no rexistro da Xunta.
MÁIS INSPECCIÓN
"Se estás a te anunciar nun portal de vodas, tes a responsabilidade de que este local estea correcto", expuxo o representante de Ascega, para quen os datos que recolle o informe son "escandalosos". Ademais, reprochou ás administracións que non estean a facer "nada". "Fan as leis, pero non as vixían", denunciou. Ante esta situación, manifestou que por parte de Ascega "seguirán facendo accións legais para que os que están ilegal cesen a actuación".
No entanto, recalcou que o seu informe ten que ver máis con que a administración "tome conciencia e cumpra a lexislación". "Todas as administracións públicas levan anos sen exercer a súa función de vixilancia e inspección deste sector", incidiu.
