Luís López quere ser o substituto de Rueda na presidencia do PP de Pontevedra

Luís López, delegado territorial da Xunta en Pontevedra, confirmou este venres a súa candidatura para presidir o Partido Popular na provincial de Pontevedra, coa que aspira a tomar a substitución de Alfonso Rueda. Nunha comparecencia de prensa convocada este venres na sede provincial do partido, López afirmou que defende "un proxecto forte e ilusionante, de todos e para todos e desde a unidade". Para iso, presenta a súa candidatura "con humildade, con toda a ilusión e, sobre todo, con moita responsabilidade, consciente do gran reto que supón presidir este partido".

Se os afiliados lle dan o apoio maioritario no congreso do 9 de xullo, López asumirá a presidencia provincial do PP marcándose tres obxectivos "moi claros". O primeiro é o de reforzar as xuntas locais do partido nos 61 concellos, coa mirada posta nas municipais do ano próximo: "Nas que temos o reto de mellorar resultados e afianzar alcaldías".

Ademais, márcase como segundo obxectivo "trasladar os bos resultados conseguidos nas últimas eleccións autonómicas a todos os concellos da provincia o ano próximo", co que contribuír "ao cambio necesario en España con Alberto Núñez Feijóo". Por último, está "revalidar a quinta maioría absoluta en Galicia en 2024, con Alfonso Rueda".

Luís López explicou que tomou a decisión de presentar a súa candidatura porque considera que cumpre cos requisitos para suceder a Alfonso Rueda: "Tanto polo cargo orgánico que veño desenvolvendo no partido, como secretario xeral, así como polo coñecemento global da provincia e o contacto coas agrupacións locais que teño como delegado da Xunta en Pontevedra", sostén.

Durante a súa intervención, agradeceu as mostras de ánimo que recibiu de compañeiros do PP e subliñou que non ten "máis vocación que ser útil ao partido, e contar con cada alcalde, cada portavoz e cada militante".

"Non me move ningunha ambición política ou de gran calado", sinala o exalcalde de Rodeiro.