O Sergas actualiza a categoría de médico de admisión e documentación clínica tras 20 anos para axustala á realidade
A súa xornada poderá comprender, con carácter adicional, "a realización de xornada complementaria ou atención continuada en réxime de localización".
Por E.P. | Santiago de Compostela | 14/06/2022 | Actualizada ás 11:43
O Servizo Galego de Saúde (Sergas) actualiza o ámbito funcional da categoría de médico de admisión e documentación clínica porque "resulta 20 anos despois pouco axustado á actual realidade organizativa".
Así o publica este martes o Diario Oficial de Galicia (DOG) nun decreto da Consellería de Sanidade, recollido por Europa Press, no que se concreta que "o ámbito funcional da categoría de médico/a de admisión e documentación clínica, tan directamente vinculado na norma a centros hospitalarios, resulta vinte anos despois pouco axustado á actual realidade organizativa, e procede por tanto actualizalo".
Neste sentido, sinala Sanidade que "en aplicación dos principios de necesidade, eficacia, proporcionalidade e eficiencia", a norma "persegue un obxectivo de interese xeral, como é adaptar a categoría de médico de admisión e documentación clínica a unha nova realidade organizativa e prestacional e un novo marco xurídico da relación de emprego do persoal estatutario".
"En virtude dos principios de seguridade xurídica e simplicidade, a norma garda coherencia co resto do ordenamento xurídico", indica. Este decreto entrará en vigor aos 20 días da súa publicación no DOG.
ACCESO
Para acceder á categoría de médico de admisión e documentación clínica, como persoal estatutario fixo ou temporal, "será indispensable", sinálase no decreto, "estar en posesión do título de grao ou licenciatura en Medicina e calquera título de médico especialista expedido polo correspondente ministerio".
En caso de titulacións extracomunitarias ou obtidas noutro Estado membro da Unión Europea, deberá achegarse, ademais, o documento que acredite fidedignamente a súa homologación e recoñecemento.
