San Simón, epidentro dunhas xornadas sobre a "importancia histórica e cultural" do exilio

Os legados artísticos, musicais, literarios, políticos e históricos que deixaron as persoas que tiveron que exiliar. Este foi o centro das análises que se desenvolveron este xoves no congreso 'Legados dende a dislocación. Intervencións no presente e imaxinación do futuro nos exilios da Guerra Civil' que organiza o Consello da Cultura Galega (CCG) na Illa de San Simón.

"A situación actual da guerra da Ucraína ponnos na sensibilidade de recoñecer a importancia dos exilios e a necesidade da súa análise", afirmou a presidenta do CCG, Rosario Álvarez, na

inauguración. A cita, que busca prestar atención ás formas de inserción das persoas exiliadas nas sociedades de acollida dende a militancia, aos legados culturais que deixaron durante o tempo no desterro e aos futuros que imaxinaron, remata este venres cunha conferencia de clausura a cargo do historiador Xosé Manuel Núñez Seixas, logo dun percorrido a través dos legados culturais.

O historiador e expresidente do CCG, Ramón Villares, foi o encargado da conferencia de apertura que ofreceu, en clave “galeuzcana”, un relato da conexión do exilio co período de transición democrática. A súa intervención partiu da coñecida como comisión dos 'nove', constituída pola oposición antifranquista que chegou a unha serie de acordos e pactos con Adolfo Suárez para trazar un percorrido histórico que o levou desde a Guerra Civil do 36 ata o presente. 

XORNADA DO VENRES

O Congreso remata este mesmo venres con dúas mesas. A primeira delas está encamiñada a ofrecer unha ollada de futuro. Giulia Quaggio será a moderadora e nela participan Manuel Artime, da Universidad Nacional de Educación a Distancia (UNED), que falará das Españas do exilio; Mari Paz Balibrea, da University of London, quen ofrecerá un relatorio titulado “Renuncia á identidade e imaxinación posnacional na obra de Josep Solanes”; e Pablo García Martínez, da Universidade de Santiago de Compostela, que tratará o legado do Laboratorio de Formas de Galicia.

A terceira e última mesa leva por título “Legados culturais” e modera Manuel Artime. Conta coa presenza de Jorge de Hoyos Puente, da UNED, que abordará os legados institucionistas no exilio republicano; Teresa López, da Universidade da Coruña, que presentará “(Re)creando comunidade: o teatro galego en Bos Aires, entre a emigración e o exilio” e por último, Eva Moreda, University of Glasgow, que trata o “Diálogo interxeneracional e memoria na España posfranquista. O Libro de cantares de Julián Orbón”. A conferencia de clausura corre a cargo do historiador e vicepresidente do Consello da Cultura Galega, Xosé M. Núñez Seixas.

Esta actividade insírese no marco do convenio asinado entre o CCG e o Concello de Redondela para desenvolver unha actividade anual relacionada co pasado histórico da illa, ben sexa medieval, ben sexa como lugar de memoria.