Andalucía: O PP fala dun "efecto Feijóo" e BNG e PSdeG ven un "erro" facer lecturas xerais das eleccións

O presidente do PPdeG e da Xunta de Galicia, Alfonso Rueda, felicitou este luns ao presidente da Xunta de Andalucía e gañador das eleccións deste domingo con maioría absoluta, Juanma Moreno, que obtivo un resultado que afasta "extremismos e populismos". En declaracións aos medios de comunicación, Rueda celebrou o "magnífico resultado" dos 'populares' andaluces, que superou "as maiores expectativas", e asegurou que xa tivo a ocasión de felicitar tanto a Moreno como ao presidente do PP estatal, Alberto Núñez Feijóo.

"É un cambio importante para Andalucía que tivo a súa ratificación nas eleccións", engadiu o presidente dos 'populares' galegos, insistindo na "abafadora" aposta dos andaluces por "seguir consolidando ese cambio". A partir de agora, segundo Rueda, Moreno cumprirá co seu programa electoral para seguir acreditando que merece o posto de presidente da Xunta, grazas a que non depende de ninguén para gobernar. 

Precisamente, preguntado sobre se apoiaría un pacto con Vox no caso de que non conseguise maioría absoluta, o presidente autonómico indicou que iso non ocorreu e que Moreno alcanzou o seu obxectivo, que era unha maioría suficiente para non ter que pactar e así poder a súa cumprir o seu programa. 

MANUEL BALTAR

O presidente do Partido Popular de Ourense, Manuel Baltar, valorou a vitoria da formación nas eleccións de Andalucía, para subliñar "que está rematadamente repetido pero é histórica", á vez que manifestou que supón "un cambio de ciclo" co que "o efecto Feijóo é unha realidade".

Para Manuel Baltar os resultados obtidos en Andalucía "son extrapolables" e, por iso, serven para "reflexionar e para ter unha maior carga de responsabilidade" de cara ás eleccións, porque eses 58 escanos "superan as expectativas das enquisas e dan boa fe do traballo que se fixo durante todo este tempo".

MIGUEL TELLADO

O vicesecretario de Organización do PP, Miguel Tellado, considera que esta maioría absoluta de Juanma Moreno supón "un cambio de ciclo" na política estatal e unha "chamada de atención" ao PSOE. "O sanchismo perdeu as eleccións, os españois queren un modelo distinto ao que ofrece o Goberno de Pedro Sánchez", aseverou o dirixente popular, nunha entrevista concedida este luns á Televisión de Galicia (TVG) e recollida por Europa Press.

O vicesecretario do PP asegurou que a "aspiración" de Alberto Núñez Feijóo é conseguir "a maioría de oito, nove, dez, once millóns de votos de españois que queren unha política centrada nas persoas". "Estamos máis preto hoxe de conseguilo que hai unha semana", engadiu. O vicesecretario de Organización dixo que a cidadanía mira cara ao PP "en busca de solucións e respostas", cun modelo de Feijóo que busca "construír grandes maiorías que dean estabilidade".

A secretaria xeral do PPdeG, Paula Prado, felicitou ao candidato popular nas eleccións andaluzas do domingo, Juanma Moreno, e dixo que a súa vitoria cunha maioría absoluta histórica servirá "de impulso e de ánimo" para conseguir un "cambio" na política española nas próximas xerais e nas municipais de maio do 2023, particularmente en Galicia.

ANA PONTÓN: "É UN ERRO FACER LECTURAS XERAIS"

A portavoz nacional do BNG, Ana Pontón, considerou "un erro" facer lecturas xerais das eleccións andaluzas ao asegurar que "a cidadanía vota diferente en cada proceso". "Facer lecturas xerais dunhas eleccións andaluzas é un erro, pode ser unha tentación para algunha forza política pero sabemos que a cidadanía vota diferente en cada proceso", sinalou nunha rolda de prensa celebrada este luns.

Pontón incidiu en que "non se vota igual" nunhas xerais, que nunhas autonómicas ou unhas municipais. "É un erro pensar que hai unha translación directa a outros procesos electorais para os que aínda falta moito tempo para que se produzan", indicou. Ademais, aproveitou para celebrar a vitoria de esquerda nas eleccións de Colombia. "É un motivo de alegría ver como a esquerda está avanzado, vímolo hai pouco en Chile e aí agora vemos que hai unha alternativa que se vai fortalecendo", destacou.

PSDEG: "O ÚNICO POSITIVO É QUE VOX NON ENTRA"

A viceportavoz parlamentaria do PSdeG, Begoña Rodríguez Rumbo, recoñeceu que os resultadosnon son os que ao socialismo lles gustaría ter e sostivo que o "único positivo" é que "Vox non entra no goberno". Rodríguez Rumbo sostivo que cada territorio ten "as súas propias dinámicas" e "as súas propias formas de entender a política". "En Andalucía o PP ten unha dinámica propia que o levaría a sacar a maioría", dixo Rodríguez Rumbo, que considerou que se deben analizar "moitas vertentes" xa que "nunca se gaña por unha soa causa nin tampouco nunca se perde por unha soa causa".

Por iso, considerou que trasladar o resultado das andaluzas a unha "dinámica nacional non é en absoluto correcto". Ademais, lembrou que o próximo ano se celebrarán os comicios locais e preguntouse se se debería trasladar ás xerais os resultados positivos que o PSdeG poderá obter en cidades como Vigo.

Pola súa banda, o alcalde de Santiago, Xosé Sánchez Bugallo, felicitou este luns a Juanma Moreno e congratulouse de que Vox quede fóra do posible futuro Goberno. "Os cidadáns andaluces foron sensibles ao argumento de que non querían que Vox formase parte do goberno", dixo o rexedor compostelán, preguntado polo resultado dos comicios que, admitiu, "non foi precisamente óptimo" para os socialistas. "Eu preferiría que fose o Partido Socialista, pero, non séndoo, a outra alternativa posible é o PP. Prefiro esta solución á que se adoptou en Castela e León", resolveu.

A continuación, expresou o seu desexo de que, "nuns anos", Vox "siga a mesma evolución que outras forzas que creceron exponencialmente nun momento dado", dixo, en referencia a Ciudadanos e Podemos, "e que as augas volvan á súa canle, que é o marco do constitucionalismo". "O que dá estabilidade ao noso país é que haxa dous partidos maioritarios", expresou Sánchez Bugallo, facendo fincapé no necesario respecto "ao marco constitucional".