Reunión internacional de científicos en Santiago para abordar un proxecto para a produción de silicio a baixo custo

Investigadores galegos, europeos e americanos reuniranse este martes en Santiago de Compostela para avanzar nun proxecto que busca a produción de silicio a baixo custo e de forma sustentable.

O encontro está promovido polo Centro de Investigación e Tecnoloxía Matemática de Galicia que informou de que a Facultade de Matemáticas da Universidade de Santiago acolle esta reunión dos socios que integran o proxecto europeo 'SisAl Pilot', "innovador que busca a produción de silicio con baixo impacto ambiental e de forma circular e sustentable".

Coordinado desde a Universidade Norueguesa de Ciencia e Tecnoloxía (NTNU), o proxecto está promovido por un consorcio internacional de 22 socios, do que forman parte centros de investigación europeos como o Centro de Investigación e Tecnoloxía Matemática de Galicia (CITMAga) e empresas nacionais e internacionais para a aplicación dos resultados, entre elas a galega Fundiciones Rey.

A apertura do encontro será ás 9,30 horas deste martes e no mesmo participarán a decana da Facultade de Matemáticas da USC, Elena Vázquez Cendón; a coordinadora do proxecto e profesora da Universidade Norueguesa de Ciencia e Tecnoloxía Gabriella Tranell; xunto á directora científica en funcións do CITMAga, Rosa María Crujeiras.

Durante a xornada deste martes os asistentes -procedentes de Noruega, Alemaña, Francia, Islandia, Italia, Grecia, EEUU, Sudáfrica e España- porán en común os principais avances logrados no último ano do proxecto.

Iniciado hai dous anos e cunha duración de catro, este proxecto está financiado polo programa de investigación e innovación Horizon 2020 da Unión Europea, cun orzamento global que supera os 14 millóns de euros.

Investigadores que se reúnen mañá en Santiago para avanzar nun proxecto que busca a produción de silicio a baixo custo e de forma sustentable.. CENTRO DE INVESTIGACIÓN E TECNOLOXÍA MATEMÁTICA | Fonte: Europa Press