O sector da danza en Galicia contará cun Plan Integral para fomentar a súa actividade

A Xunta e o sector da danza en Galicia acordaron este martes un documento de propostas prioritarias que servirá de base para a redacción e posterior aplicación dun Plan Integral de Danza. Entre outras cousas, o texto apunta como prioridades o impulso á programación de danza, o fomento das residencias artísticas, unha maior profesionalización, o apoio ao talento emerxente ou a revisión das convocatorias de subvencións e coproducións.

Segundo destacou a Consellería de Cultura nun comunicado, máis dun centenar de axentes culturais e profesionais da danza contribuíron ao traballo da mesa de coordinación do Plan na que estiveron representadas as principais asociacións do sector da danza e as artes do movemento en Galicia -- Escena Galega, Colectivo Rescat-Arte, Plataforma Artes do Movemento e Plataforma da Danza Galega --, ademais da Axencia Galega de Industrias Culturais, así como salas de artes escénicas, festivais e responsables de programación.

Así mesmo, o departamento de Cultura subliñou que "todos os membros" da reunión coincidiron en sinalar entre os obxectivos que debe desenvolver o Plan Integral para a Danza o impulso da exhibición desta disciplina nos escenarios galegos e o desenvolvemento de programas de residencias artísticas, nas súas diversas tipoloxías, ademais da revisión das bases das convocatorias de subvencións e de coproducións ou a ampliación dos obxectivos do Centro Coreográfico Galego para intensificar as colaboracións estatais e internacionais.

MÁIS APOIO E VISIBILIDADE

Por outra banda, o documento tamén recolle outras propostas destinadas a lograr unha maior profesionalización do sector, a visibilidade das actividades no rural, o fomento da heteroxeneidade de linguaxes, o apoio do talento emerxente ou a creación de actividades de mediación, xunto con outras encamiñadas a lograr unha maior difusión da danza e artes do movemento nos medios de comunicación ou a reactivación da campaña de declaración do baile tradicional galego como Ben de Interese Cultural.

A partir deste momento, engadiu a administración autonómica, iníciase unha nova fase na que estas propostas se clasificarán en liñas e obxectivos estratéxicos, de maneira que se constituirán grupos de traballo específicos para abordar cada unha delas "con diálogo co sector e baixo a revisión periódica da evolución do proceso". O obxectivo final é a redacción do Plan que, segundo a Xunta, "marcará o desenvolvemento e execución" nos próximos anos destas medidas de mellora por parte do Goberno galego.

O director da Axencia Galega dás Industrias Culturais, Jacobo Sutil, preside a reunión previa á redacción do Plan Integral para a Danza.. XUNTA - XOÁN CRESPO | Fonte: Europa Press