Por Europa Press / Redacción | SANTIAGO DE COMPOSTELA | 21/07/2022 | Actualizada ás 12:22
O presidente da Federación Nacional de Confrarías de Pescadores e patrón maior do peirao de Burela, Basilio Otero, volveu pedir ao Goberno central que "se tope" o prezo do combustible en 70 céntimos o litro para "ser rendibles".
Otero explicou que seguen "pescando" a pesar dos custos. "Nos últimos días baixou un pouco o prezo do gasoil e agora estamos ao redor dos 80 céntimos, pero estivemos con prezos de noventa céntimos e mesmo dun euro por litro", advertiu.
"É un pequeno alivio, pero faría falla que baixase un pouco máis. A ver se a tendencia é esa, de seguir baixando, e recuperamos a normalidade", desexou. De momento descártase un "amarre xeral", deixando caer Basilio Otero que "se dan sobre todo no Mediterráneo, pero son paros moi puntuais".
O empresario burelense constatou que esta semana mantiveron unha reunión coa secretaria xeral de Pesca, Alicia Villauriz, que "estivo a explicar cales son as axudas" e lembrou que "estaban dispoñibles uns créditos ICO, unha nova liña para a pesca que ata agora non tiñamos".
Á alta funcionaria pedíuselle que se poña un "prezo máximo ao gasóleo e díxonos que a Comisión Nacional da Competencia non o deixaba facer, pero nós seguiremos reivindicando que non podemos estar en prezos por encima dos 70 céntimos por litro".
"Ese é o tope que consideramos que se ten que aplicar para poder ser rendibles", resumiu finalmente o presidente da Federación Nacional de Confrarías de Pescadores.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.