Conclúe a Ecomarcha 2022 ao berro de "Lumes nunca máis"

O pelotón de Ecoloxistas en Acción, conformado por máis de 100 persoas, dixo este sábado adeus a Galicia ao dar por pechada esta 11ª edición do roteiro ciclista. A marcha, na que a onda de calor extrema non conseguiu desanimar ás ciclistas, concatenou dúas semanas de solidariedade coas causas ambientais e sociais que foron atopándose ao seu paso.

Ao longo das primeiras etapas, que discorreron pola provincia de Pontevedra, o ecopelotón estivo coa plataforma Touradas fóra de Pontevedra e coa Asociación en Defensa da ría de Pontevedra. Representantes de ambas as asociacións participaron no acto inaugural da Ecomarcha 2022 realizado en dita cidade. Antes de penetrarse na provincia da Coruña, a Ecomarcha visitou o proxecto de custodia do territorio do Coto de Erixiña en Cotobade e reuniuse coas plataformas Eólica Así Non e Alarma Terra de Montes, cuxa comarca está ameazada polo proxecto de explotación mineira Alberta I e por unha gran acumulación de autorizacións de parques eólicos.

Camiño á ría Muros - Noia, a Ecomarcha fixo un alto na mina de San Finx, onde veciñanza de Lousame explicau a "gran ameaza ambiental" que supón a reapertura desta explotación mineira. Esta terceira etapa acabou en Outes coa presentación na Casa da Cultura da campaña “Humidais para a vida” da Federación Ecoloxista Galega.

De camiño á Costa da Morte, o pelotón realizou unha manifestación ciclista polas rúas de Compostela, desde a estación de tren ata a praza do Obradoiro, para reclamar avances reais na transición enerxética que permitan superar a crise climática de forma socialmente xusta. Na mesma praza do Obradoiro, as ciclistas reuníronse coa plataforma Mina de Touro Non para escoitar a ameaza ambiental que supón para a bacia do río Ulla o novo intento de retomar esta explotación mineira.

No ecuador da Ecomarcha, a xornada de descanso coincidiu en Camariñas coa celebración do Carmen, patroa de mariñeiras e mariñeiros. E xa renovada a marcha, durante as tres etapas que foron norteando pola Costa da Morte, o pelotón verde puido apreciar a "continua agresión que sofren os brezais atlánticos polas plantacións masivas e indiscriminadas de eucaliptos·. En Carballo, visitaron a "perigosa" mina abandonada e sen restaurar de Monte Neme, "un claro exemplo", explican, "do desastre ambiental que provoca a permisividade das administracións coa industria mineira".

Na súa novena etapa, a Ecomarcha rodeou a Torre de Hércules para lembrar o desastre do petroleiro Mar Exeo que, hai 30 anos, tinguiu de negro o mar e ceo da cidade herculina. Antes de abandonar a cidade da Coruña, o pelotón circulou polo carril ciclista ata a praza de María Pita onde demandou máis medidas que fomenten a mobilidade sostible.

Para a Ecomarcha, a planta regasificadora de Mugardos era parada obrigada. Diante dos depósitos de Reganosa e da man do Comité Cidadá de Emerxencia Social da ría de Ferrol, denunciou a contribución desta planta ao "colapso biolóxico da ría de Ferrol" e a "irresponsabilidade" das administracións que seguen investindo en infraestruturas gasísticas.

Na undécima etapa, a Ecomarcha fixo un alto para sumarse aos actos de protesta convocados por toda Galiza ante a grave situación ambiental e social provocada pola onda de incendios que arrasan o territorio, debido á "precariedade e falta de medios nos labores de prevención e extinción de incendios forestais".

Dúas longas etapas, con finais en Monfero e logo en Xermade, foron necesarias para alcanzar a Terra Cha en Lugo. A Ecomarcha tivo tempo para visitar o parque natural da Fragas do Eume, que presume de ser o bosque atlántico costeiro mellor conservado de Europa. Tamén para reunirse coas plataformas Monfero di Non e Terra Cha, preocupadas pola cantidade de macroparques eólicos que se proxectan na súa comarca. 

Xa en Lugo, o destino final, a Ecomarcha percorreu as súas rúas e parou en distintos sitios como o Club Fluvial para denunciar as agresións ambientais en torno ao río Miño. Ademais, o pelotón concentrouse diante da estación de ferrocarril para reivindicar a restitución dos trens nocturnos. 

Así transcorreron as dúas semanas nas que a Ecomarcha 2022 percorreu gran parte do territorio galego baixo o lema de 'Sempre Máis'. "Sempre máis coas persoas que defenden o seu territorio das agresións ambientais, sempre máis con todas as que loitan día a día por preservar un planeta verde e azul para as xeracións vindeiras. O futuro non pode ser a entulleira do presente", declarou Roberto Vilela, voceiro de Ecoloxistas en Acción.