Crise no Concello de Ourense: Jácome rompe por segunda vez co PP e di, agora, que "é un lastre"
O rexidor de Ourense acusa os populares de "tomadura de pelo". "Agora seguiremos mellor que nunca, transformando a cidade", di. O PP, pola súa banda, atribúe á chegada de Manuel Cabezas ao grupo o "motivo da saída" do goberno de Jácome.
Por Europa Press / Redacción | OURENSE | 26/07/2022 | Actualizada ás 14:46
O alcalde de Ourense, Gonzalo Pérez Jácome (Democracia Ourensana), anunciou que rompe o pacto de goberno co PP tanto no Concello como na Deputación. Así o anunciou o propio rexedor municipal nunha rolda de prensa de última hora tras non acudir o Partido Popular a unha reunión á que foran convocados polo alcalde para coñecer que había de certo nas informacións sobre a intención da formación de abandonar o grupo de goberno.
Segundo Pérez Jácome, a situación era "unha tomadura de pelo", algo que como alcalde municipal se nega a "tolerar". Por iso, avanzou que "quitará todas as competencias a todos os concelleiros do Partido Popular". Asegura que se "ven obrigados" polo PP por ser "imperdoable" o que fixeron.
Así, engadiu que a ruptura se traslada tamén á Deputación Provincial, onde considera que a súa formación, Democracia Ourensá, é chave pero xa non participará no "voto coordinado". Do mesmo xeito, indicou que o deputado de DO, Armando Ojea, deixará de asistir ás xuntas de goberno. "Hai cousas que non se poden tolerar" e "ata aquí chegamos", resolveu Pérez Jácome. Avanza que rescindirá as dedicacións exclusivas do Partido Popular e expón que o resto do mandato municipal realizarano os catro concelleiros actuais de Democracia Ourensá.
Por parte do Partido Popular, trasladan que si houbo presenza da formación na reunión convocada esta mañá de luns, pois expoñen que asistiu a edil de Facenda, Ana Morenza. Con todo, o rexedor esixía a presenza da portavoz dos populares, Flora Moure, e do secretario local do partido, Jorge Pumar.
Jácome afeou a ambos que manifestasen a súa non asistencia por motivos de axenda con "minutos escasos" de antelación, a pesar de que "teñen dedicación exclusiva". Así as cousas, o rexedor sentenciou que se senten "liberados do lastre do PP", polo que agora seguirán "mellor que nunca, transformando a cidade".
FUTURO DO CONCELLO
Neste sentido, dixo que o fin do bipartito afectará "un 0 por cento" ao funcionamento do Concello, porque "moitos dos concelleiros seguían co mesmo sinal que no mandato do 2015 ao 2019" e "se algo funcionaba é porque DO está a presionar e apertando".
Así as cousas, preguntados sobre se lle preocupa que o exalcalde Manuel Cabezas, que o sábado foi ratificado como líder local do PP, chegue a ser o candidato á alcaldía polo PP, Jácome foi claro: "A min gústame que Manuel Cabezas sexa o candidato porque realmente creo que é unha rémora para o partido, e oxalá Paco Rodríguez encabece a lista do Partido Socialista".
Deste xeito finalizou esgrimindo que "o mellor que lle puido pasar a Ourense e que lle pode pasar é que Democracia Ourensana estea na alcaldía", e avanzou que nas eleccións vai tentar "gañar por maioría absoluta" e, se non, prevé "unha maioría simple", pero eludindo pronunciarse sobre se volvería pactar de ser necesario.
PP DE OURENSE
Pola súa banda, o PP de Ourense atribúe á chegada de Manuel Cabezas ao grupo o "motivo da saída" do goberno dirixido por Gonzalo Pérez Jácome. A pesar de que Jácome fixo público o anuncio do cesamento dos sete edís populares sosteñen que "apoiados polo liderado de Manuel Cabezas esta saída é unha nova etapa, un ciclo en positivo".
Din que a edil de Facenda, Ana Morenza, ía trasladar na mañá deste martes ao rexedor a "chamada á reflexión colectiva", que propuña o novo presidente da xunta local do seu partido, sobre "a idoneidade ou non de soster un goberno de coalición no grupo municipal". Así, os populares sinalaron que non poden desenvolver o seu labor ao 100%. Con todo, non foi posible ao non ser recibida, porque Pérez Jácome considerou que era unha "interlocutora non válida".
"Mantivemos este pacto polo interese, por non paralizar o Concello de Ourense, pero era moi difícil gobernar" en coalición con "quen falta o respecto de forma constante" e con quen "non están de acordo na súa forma de facer política, incluíndo agresións verbais", "liñas vermellas" que aseguran que o alcalde "rompeu" en numerosas ocasións. Así as cousas, prometen pór "toda a súa enerxía en elaborar un proxecto de cidade que encare o futuro do progreso que Ourense merece e que hoxe tristemente non ten".
REACCIONES OPOSICIÓN
Tras coñecerse a noticia do cesamento, sucedéronse as reaccións. Os primeiros foron os representantes do Bloque Nacionalista Galego que esixen que "PP e DO deixen de xogar co Concello". Os nacionalistas pediron "respecto aos veciños" e lamentaron o "continuo despropósito" dos "socios de goberno centrados en réditos electorais e cuestiones partidistas", porque consideran que o sucedido este martes é "unha nova mostra" de que "nin a uns nin outros lles interesa Ourense absolutamente nada".
Valoración similar a que fai a executiva municipal do Partido Socialista de Ourense, que esixe que a cidade "deixe de ser o xoguete roto" de ambas as formacións e critica "sete anos de parálises irresponsabilidade política, intereses partidistas e vergoña". Preséntanse, neste contexto, como a "alternativa necesaria e imprescindible para defender os intereses dos veciños".
Pola súa banda, desde Coalición de Centro Democrático, na que se atopan tres dos concelleiros non adscritos do Concello de Ourense, afiliados con anterioridade a Democracia Ourensana, esgrimen que votarían a favor da que foi a lista máis votada nas anteriores eleccións "nun suposto pleno de investidura". Así, CDC asegura que é "imprescindible" que Partido Popular e Partido Socialista cheguen a un acordo para "presentar unha moción de censura" a Gonzalo Pérez Jácome: "Seriamos todos uns irresponsables se mantemos un día máis a estupidez e maldade política de Jácome", finalizan os excompañeros do rexedor municipal.
