Aprehendidos máis de 80k de marisco ilegal, entre eles, especies vedadas como a centola
Por E.P. | SANTIAGO DE COMPOSTELA | 27/07/2022 | Actualizada ás 10:30
O Servizo Marítimo da Garda Civil aprehendeu en Malpica de Bergantiños 18,5 quilos de centola ovada, especie que ademais está vedada actualmente, e outros 62,5 quilos de longueirón que non tiña documentación que amparase a súa rastrexabilidade.
Os feitos, segundo informa a Benemérita, ocorreron cando efectivos desta unidade realizaban un control de pesca na estrada DP-4305 e observaron un vehículo que se aproximaba onde eles estaban.
Así, os actuantes detiveron o vehículo para comprobar a súa carga e acharon nun capacho de plástico os 18,5 quilos de centola, especie vedada, e comprobaron que todos os exemplares estaban ovados. Ademais, outros dous recipientes e unha bolsa contiñan longueirón que non tiña a pertinente documentación.
Por iso, a Garda Civil pediu ao condutor que desprazase o seu vehículo ás instalacións da lonxa de Malpica de Bergantiños para proceder á pesada das capturas --18,5 quilos a centola e 62,5 o longueirón-- e á súa incautación para proceder á correspondente denuncia de acordo coa lei galega de pesca.
Tras comprobar que non había mortaldade entre os especímenes achados, procedeuse á sementeira das centolas nas proximidades do Porto de Malpica e dos longueirones no banco marisqueiro Corme-Laxe, lugar do que foran extraídos.
