Traballadores de centros sociosanitarios públicos denuncian os "contratos lixo" da Xunta

Técnicos en coidados auxiliares en enfermaría dos centros sociosanitarios públicos dependentes da Consellería de Política Social denuncian "falta extrema" de persoal nas quendas de traballo con "as garantías suficientes para unha correcta e digna atención aos usuarios".

Os empregados aseguran que traballan cunha "saturación de traballo grandísima" xa que, segundo explicaron, "non hai persoal nas listas de contratación temporal". Así mesmo, manifestaron que as condicións dos contratos fan que moitos compañeiros apuntados nas listas decidan optar por contratos no Sergas, residencias privadas ou outras opcións.

Neste sentido, cualificaron de "contratos lixo" contratos de media xornada ou fin de semana que fan que "as listas queden baleiras".

"A nosa sobrecarga de traballo excede, con moito, os límites extremos en moitos departamentos de determinados centros, ocasionando lesións ou baixas laborais, que non poden cubrirse, nalgúns casos, ao non haber persoal nas listas de contratación temporal e, por tanto, os coidados aos residentes non son os adecuados que se lles daría cun persoal completo", manifestaron nun comunicado.

Ante isto, algúns centros como o de CAPD Redondela, así como a segunda planta do CRAPD 1 de Vigo presentaron queixas ante a Valedora do Pobo, xa que insisten en que a carga de traballo é "extrema".

Traballadores das listas temporais de residencias públicas de maiores e de persoas dependentes de Galicia maniféstanse ante a sede do Goberno galego en San Caetano, Santiago de Compostela. | Fonte: Europa Press