Trasladan a un bañista que sufriu unha indisposición nunha praia do Grove
O home tivo que ser evacuado dende o areal da Lanzada a un hospital.
Por E.P. | SANTIAGO DE COMPOSTELA | 06/08/2022 | Actualizada ás 14:45
Un home tivo que ser derivado ao hospital en ambulancia tras sufrir unha indisposición cando se bañaba no mar na praia da Lanzada, no municipio pontevedrés do Grove. Segundo informan a Europa Press fontes dos servizos de emerxencias, ocorreu sobre as 13,00 horas deste sábado no citado areal, desde onde o 112 recibiu chamadas para alertar dun home que se atopaba mal.
Seguidamente, a central de emerxencias pasou o aviso a Urxencias Sanitarias de Galicia-061, que mobilizou ata a praia un helicóptero medicalizado e unha ambulancia cun médico da PAC do Grove. Os profesionais asistíronlle no propio lugar dos feitos e finalmente foi trasladado pola ambulancia ata o Hospital do Salnés.
