O PPdeG anima aos galegos a doar sangue tamén no verán, cando as reservas baixan

A secretaria xeral do PPdeG, Paula Prado, animou este martes aos galegos a doar sangue xa que, segundo ela, trátase dun "xesto sinxelo" e que permite atender unha media de 2.700 urxencias, máis de 500 intervencións cirúrxicas e ao redor de 3 transplantes ao día en Galicia.

"Doamos sangue co obxectivo de doar vida. É imprescindible a xenerosidade e o altruísmo que sempre demostran os galegos, aos que lles pido un pequeno esforzo durante os meses de verán nos que o número de doazóns descende", subliñou o número dous dos 'populares' galegos, que acudiu a doar a Santiago de Compostela, para o que xa non é necesario concertar cita previa.

Estímase que os hospitais galegos necesitan cada día entre 400 e 500 doazóns, polo que as distintas unidades móbiles da Axencia de Doazón de Órganos e Sangue seguen visitando este mes diferentes localidades de toda a Comunidade. Ademais, o PPdeG impulsou a campaña #ObxectivoDoarVida nas redes sociais para concienciar á poboación.