Falece aos 110 anos a muller máis lonxeva de Galicia, María del Carmen Nouche
O pasamento tivo lugar na súa casa de Ordes. Nacera en 1911.
Por Europa Press / Redacción | SANTIAGO DE COMPOSTELA | 24/08/2022 | Actualizada ás 18:05
A que ata agora era a persoa máis lonxeva de Galicia, María del Carmen Nouche Porro, veciña do municipio coruñés de Ordes, faleceu aos 110 anos, segundo informa o Concello. Nada na parroquia de Barbeiros, en Ordes, esta muller estaba preto de cumprir os 111 anos, nacida o 15 de setembro 1911, polo que viviu as dúas Guerras Mundiais e a Guerra Civil.
O Concello de Ordes mostrou a súa "sincera condolencia" á familia desta residente no lugar da Senra, parroquia de Poulo, falecida o pasado martes. Tivo tres fillos, así como varios netos, bisnetos e tataranetos. "Foi e será para cantos a coñeceron un exemplo a seguir pola súa enteireza e capacidade de sobreporse aos reveses da vida. E tamén porque despois dunha longa vida de traballo e dificultades gozou do agarimo e dos coidados da súa familia", destaca o Concello.
A capela ardente sitúase no tanatorio de Ordes. O enterro celebrarase na tarde do xoves --saída do tanatorio a partir das 18,00 horas-- na igrexa de San Xulián de Poulo.
