Por E.P. | SANTIAGO DE COMPOSTELA | 25/08/2022 | Actualizada ás 11:09
O Programa de Atención Integral a Mulleres con Enfermidade Mental en Situación de Vulnerabilidade, levado a cabo pola asociación de Saúde Mental Feafes Galicia, trata de fomentar a igualdade de oportunidades para reducir a discriminación que sofre ese colectivo.
Este programa traballa con 51 mulleres galegas para brindarlles unha maior autonomía e independencia, que lles permita mellorar a súa situación laboral, persoal e social. Nun comunicado, a asociación explicou que neste programa ofrecen unha atención personalizada e especializada, que inclúe información e asesoramento sobre a psicoloxía, recursos que teñen á súa disposición, o ámbito xurídico ou o acceso ao emprego. Ademais, danlles ferramentas para que saiban identificar e previr a violencia de xénero e a discriminación.
A parte disto, fixeron referencia á realización de accións grupais nas que comparten experiencias que lles axudarán a aprender. Os talleres que levan a cabo tratan sobre a autoestima, autocuidados, afectividade e malos tratos, entre outros. A duración deste programa é dun ano e esta edición termina o vindeiro martes 30 de agosto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.