Por E.P. | SANTIAGO DE COMPOSTELA | 25/08/2022 | Actualizada ás 17:04
O Concello da Coruña aplicará desde o 1 de setembro unha rebaixa do 30% en todas as tarifas do bus urbano que os usuarios e usuarias abonan co cartón Millennium, segundo informou o portavoz do goberno local, José Manuel Lage. A rebaixa aplicarase sen necesidade de solicitude previa e suporá para as persoas usuarias do bus urbano pasar de 0,75 euros a 0,52 euros por viaxe coa tarifa xeral e de 0,23 a 0,16 coa tarifa social.
O portavoz do goberno local indicou que se trata dunha decisión que responde a unha "demanda" que existe na cidade e que se adopta ao amparo das axudas estatais para "facilitar o transporte público". Ao fío diso, fixo un chamamento á Xunta para que adopte "iniciativas que se están adoptando noutras comunidades", apuntou en relación a axudas autonómicas. "Pedímoslle que non sexa un invitado de pedra, ten competencias e tamén pode facer un esforzo económico", apostilou.
Mentres, sobre a nova licitación do transporte urbano, ao acabar a concesión en 2024, apelou a promover un proceso "participativo" e "profesional" para estudar "ben" as pautas a seguir de cara a mellorar o sistema de transporte.
Preguntado sobre a planta de lixos de Nostián e as demandas sindicais para que se saque a licitación a xestión, admitiu que é unha cuestión que está "pendente". "Gustaríanos que antes de que termine o ano estivese preparada a licitación". Tamén aludiu ao traballo "previo" para , entre outras cuestións, abordar un estudo económico previamente á licitación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.