Optometristas recomendan realizar revisións ás crianzas antes do inicio do curso
"O 30% do fracaso escolar na infancia débese a problemas de visión non detectados", indica o Colexio de Ópticos de Galicia.
Por Europa Press / Redacción | SANTIAGO DE COMPOSTELA | 29/08/2022 | Actualizada ás 19:09
O Colexio de Ópticos-Optometristas de Galicia recomendou realizar revisións visuais aos nenos e nenas antes do inicio do curso escolar.
Nun comunicado, o Colexio sinalou a importancia que ten a visión porque representa o "80-90% da información percibida do exterior". Así, destacou que as revisións visuais son importantes para detectar alteracións na vista ou patoloxías que poden darse na infancia.
O presidente do Colexio de Ópticos-Optometristas de Galicia, Eduardo Eiroa, indicou que "as revisións en idade escolar son moi importantes" e estima que "o 30% do fracaso escolar na infancia se debe a problemas de visión non detectados".
Ademais, a entidade pediu colaboración de familias e titores para detectar posibles signos de falta de visión. Algúns deles poden ser: torcer a cabeza ao ler, desconcertarse con facilidade, ver mal o encerado de lonxe, desviar os ollos e achegarse demasiado aos textos ou ás pantallas para ler, entre outros.
Con todo, remarcou que os casos de miopía xuvenil están a incrementarse "polo exceso de horas que dedican os nenos á pantalla dixitais" e fai referencia a concienciar a cativada sobre un "uso moderado e non excesivo" da tecnoloxía dixital.
