O BNG alerta de que o Goberno podería poñer en risco a pesca por nasa cunha nova regulación
"A norma podería pretender que os pescadores retiren do mar as nasas dous días cada semana", advirte Rego.
Por E.P. | SANTIAGO DE COMPOSTELA | 31/08/2022 | Actualizada ás 18:57
O deputado do BNG no Congreso, Néstor Rego, rexistrou iniciativas na Cámara para coñecer o estado actual da normativa que está a elaborar o Ministerio de Agricultura, Pesca e Alimentación e que vai afectar á regulación das nasas no mar. Rego demanda a rectificación inmediata da proposta do Executivo "por invadir competencias titularidade da Xunta de Galicia". "E ante a preocupación do sector pesqueiro galego pola prohibición de deixar as nasas caladas no mar", engade.
A organización nacionalista volve sinalar a necesidade de que se transfiran a totalidade das competencias en materia de costas á Administración galega, "tal e como vén de aprobar o Consello de Ministros para o Goberno canario". O BNG reprocha, ademais, que o Ministerio pretenda "establecer a prohibición de deixar caladas no mar as nasas e outras artes de pesca no Real Decreto polo que se regulará a pesca en caladoiros estatais".
"A normativa podería pretender que os pescadores retiren do mar as nasas que utilizan na campaña de captura do polbo durante dous días cada semana", advirte.
