Sen rastro do tripulante dunha barca que apareceu envorcada entre a ría de Aldán e Bueu
Os medios iniciaron a súa retirada por esta xornalda, pero os traballos continuarán mañá.
Por Europa Press / Redacción | VIGO | 02/09/2022 | Actualizada ás 20:32
Os medios que participaron este venres nun operativo de procura coordinado por Salvamento Marítimo, para tentar localizar ao tripulante dunha barca que apareceu envorcada entre a ría de Aldán e Bueu iniciaron a súa retirada por esta xornada, sen que os labores de rastrexo desen froitos.
Así o confirmaron fontes de Salvamento Marítimo a Europa Press, que explicaron que, ao longo de todo o día, participaron na procura os helicópteros Pesca 1 de Gardacostas e Helimer 211 de Salvamento, así como a patrulleira Curvo Mariño da Garda Civil.
Sumáronse á procura por mar a embarcación auxiliar do buque María Pita e unha moto de auga de Protección Civil. Así mesmo, en terra, participou efectivos de Protección Civil, e das Policías Locais de Bueu e Cangas. Con todo, tras horas de rastrexo sen éxito, iniciouse a desmovilización dos medios e está previsto que se renoven os labores de procura este sábado.
Segundo informaron fontes do 112 Galicia e da Garda Civil, a embarcación apareceu envorcada na mañá deste venres entre as rías de Aldán e Pontevedra, sen ninguén a bordo. A alerta foi activada tras o aviso dunha patrulleira do Servizo Marítimo do Instituto Armado ao constatar que a barca estaba envorcada, semisumergida e que tiña unha bolsa cun traxe de augas. Nas inmediacións da nave localizáronse aparellos de pesca flotando e unha mazá, polo que se activou un operativo para tentar localizar ao tripulante da pequena barca.
