As picaduras de faneca supoxeron o 27% das intervencións dos socorristas de Sanxenxo en agosto
Durante o pasado mes realizaron un total de 6.526 actuacións
Por E.P. | SANTIAGO DE COMPOSTELA | 04/09/2022 | Actualizada ás 19:52
O servizo de Salvamento e Socorrismo realizou durante o pasado mes de agosto un total de 6.526 intervencións nas praias do municipio pontevedrés de Sanxenxo. Foron 80 os efectivos que se encargaron de vixiar por terra e mar os areais para garantir a seguridade e a atención dos bañistas.
Segundo detallou o Concello, as picaduras de faneca supuxeron o 27 por cento das atencións, con 1.774 casos. Así mesmo, as praias con máis volume de bañistas como Areas (313), Silgar (377), Canelas (242) e Montalvo (209) concentraron o maior número intervencións.
Por outra banda, as atencións por feridas tamén foron numerosas e alcanzaron os 767 casos. Delas, 144 rexistráronse en Silgar; 64, en Baltar; 67, en Canelas e 64, en Areas. Tamén se realizaron intervencións por contusións (43), picaduras de ourizo (81), escordaduras (19), problemas en ollos e oídos (85), picaduras de insecto (99), baixadas de tensión (79), reaccións alérxicas (20) e rescates acuáticos (7).
En canto a intervencións das embarcacións, realizáronse ata 361 avisos por infraccións de embarcacións dos que 222 foron en Silgar; 75, en Canelas; e 28, en Caneliñas. Os avisos por saltos desde rocas ou lugares elevados obrigaron a actuar en 25 ocasións e as axudas a embarcacións foron 28. Ademais, durante o mes de agosto os socorristas actuaron en 14 rescates acuáticos.
O servizo de socorrismo de Sanxenxo permanecerá activo ata o 15 de setembro nas praias de Areas, Silgar, Canelas e Montalvo, en horario de 12 a 20 horas. Durante os dous primeiros fins de semana deste mes, as praias de Foxos e A Lanzada tamén contarán con vixilancia.
