Por Europa Press / Redacción | A CORUÑA | 04/09/2022 | Actualizada ás 20:03
O PP local da Coruña anunciou que presentará unha moción na que instará o goberno municipal a pór en marcha un plan de traballo integral para a mellora da Torre de Hércules e a súa contorna, co obxectivo de "mellorar a área para os coruñeses e para os visitantes".
Para os populares coruñeses, a Torre de Hércules é "o principal polo de atención turístico herculino e un dos máis relevantes de Galicia", pero denuncian que isto "non parece ser razón suficiente nipara o seu bo mantemento nin para ser o epicentro dunha política turística local", que cualifican de "improvisación programática".
Nunha nota de prensa, indican que ao ser un recurso turístico "tan importante", ven "imprescindible" que o consistorio municipal "tome conciencia e lle dea a importancia e a prioridade que lle corresponde na execución da súa política turística".
Nesta mesma liña, expoñen que ademais das "queixas veciñais polo mal estado de conservación da contorna natural e monumental", este verán sumáronse "queixas dos turistas" por, entre outros motivos, "o mal funcionamento do sistema de venda de entradas para visitar a Torre, a ausencia dunha plataforma en liña para a súa canalización e a carencia dunha páxina web actual do monumento e de Turismo da Coruña".
Por todo iso, avanzan que proporán no próximo pleno mellorar o coidado do parque escultórico e a súa contorna, levar a cabo unha "transformación dixital real" dos contidos turísticos da Torre de Hércules e mellorar a xestión turística interna do Centro de Información e Atención ao Visitante, así como recuperar o "estado óptimo de conservación" da antiga prisión provincial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.