Alfonso Rueda reivindica o PP como "o partido do rural galego"

O presidente do PPdeG, Alfonso Rueda, reivindicou este sábado a súa formación como "o partido do rural galego", tamén nos próximos comicios locais. "Temos a confianza e sabemos que se se segue traballando como ata agora volveremos ser o partido do rural, tamén nas próximas eleccións municipais", asegurou no acto de clausura do acto 'Obxectivo Rural', celebrado esta mañá na SAT Os Agros de Santa Comba.

Alí remarcou que Galicia é unha terra "única", con 313 concellos diferentes e defendeu que o PPdeG conta con homes e mulleres que saben "interpretar" cada un dos concellos, polo que os animou a "pisar o acelerador" ata o 28 de maio de 2023 para "manter esa confianza que fai ser alcalde con maioría absoluta".

"Temos os pés na terra para escoitar e para tentar mellorar, sen ningún tipo de dogma", apuntou. A este respecto, destacou que a Xunta traballa para crear oportunidades impulsando a economía destas zonas.

"O noso deber é que cada persoa que queira emprender, sexa moza ou non, conte con facilidades, axudas e non teña trabas", continuou. Con este obxectivo, "para vivir no rural e do rural", lembrou algunhas das medidas en marcha como as casas niño, a atención primaria e as boas infraestruturas.

Nesta liña, referendou o seu compromiso de que haxa boas conexións dixitais no rural, "por ser necesarias e ter o mesmo dereito que os grandes municipios a contar con elas".

Rueda tamén criticou a aqueles que "entenden o rural como postal e pensan que as paisaxes son alleas á xente que vive neses territorios". Sobre isto, puxo como exemplo a espera pola chegada dos fondos europeos para a industria galega por parte do Goberno central.

"Canto tempo máis imos ter que esperar por un dos mellores proxectos que se presentou en toda España aos Next Generation?, por que se nos dixo que presentásemos un proxecto así?, por que o presidente Sánchez me dixo que estivésemos tranquilos, que habería noticias, e pasan os meses e non sabemos nada?", preguntouse, concretamente sobre Altri.

Engadiu a este respecto que Galicia "non vai esperar máis", xa que ten "magníficos" proxectos presentados aos fondos europeos e queren "exactamente o mesmo trato que todo o mundo, nin máis, nin menos".

Tamén cuestionou "como pode ser que a Xunta estea preto de pagar as axudas dos incendios de hai dous meses e o Executivo central soamente fixese un anuncio propagandístico sobre unhas axudas que aínda non están publicadas".

No acto, no que tamén participaron o conselleiro de Medio Rural, José González, e a secretaria xeral dos populares galegos, Paula Prado, celebráronse varias mesas de debate sobre temas "fundamentais" para o medio rural como o aproveitamento forestal e reestruturación territorial; a política desde o rural e iniciativas de novos emprendedores.