O encontro de emprendemento Pont-Up Store buscará mellorar a competitividade dos proxectos nados na pandemia

O encontro do emprendemento que a Universidade de Vigo, a través do Campus Crea, promove cada ano en Pontevedra, o Pont-Up Store, terá lugar o 23 e 24 de setembro na praza de España e buscará mellorar a competitividade dos proxectos empresariais nados na pandemia.

En total, vanse presentar 39 startups galegas; 35 serán empresas con caseta na praza de España, das que 4 desenvolverán actividades demostrativas na carpa e outras 4 participarán tamén no 'talent show' Pont-Up Exprés, onde un total de 7 iniciativas empresariais presentarán as súas ideas de negocio ante un xurado composto por 4 representantes de importantes entidades e empresas galegas.

O Pont-Up Store ofrecerá este ano máis de 30 actividades relacionadas co ecosistema emprendedor, e máis da metade serán sesións destinadas a adquirir ou mellorar competencias básicas ou específicas.

Dentro das actividades programadas, destaca o primeiro 'escape room' cultural ao aire libre de Galicia, unha experiencia especialmente deseñada para a cidade de Pontevedra.

O encontro ofrecerá tamén a oportunidade de facer un primeiro achegamento ás posibilidades de internacionalización ao alcance dos novos emprendementos galegos.

Tamén se desenvolverán os talleres de R enfocados a espertar a vocación emprendedora en contornas tecnolóxicas a idades temperás.

Este encontro de emprendemento estivo aberto á participación de empresas constituídas no últimos tres anos e medio, constatando os organizadores a existencia dunha serie de proxectos "aos que lles faltaba un punto de madurez, derivado destes dous anos de covid-19 e restricións".

Isto motivou que desde a organización do evento optásese por recuperar "unha serie de actividades formativas" sobre cuestións "como a viabilidade económica, a mercadotecnia, as axudas e subvencións ou as fórmulas de cooperativismo".

Preto do 80% dos proxectos presentados á Pont Up Store están liderados por mulleres. A isto súmase que tan só hai 20 homes entre os 70 relatores participantes nas diferentes actividades.