Unións Agrarias acusa a Mercadona de conxelar o prezo do leite a pesar da "situación límite" das explotacións
"Así, mentres outras cadeas de distribución equilibraron o prezo do cartón de leite coa nova situación de custos dos gandeiros, Mercadona segue forzando prezos anormalmente baixos para mellorar a súa conta de resultados", afirma a organización
Por Europa Press / Redacción | SANTIAGO DE COMPOSTELA | 14/09/2022 | Actualizada ás 16:53
A organización Unións Agrarias denunciou este mércores a política de comercialización que está a desenvolver a cadea Mercadona para "manter artificialmente os prezos baixos do leite" nos seus establecementos, "condicionando as negociacións dos novos contratos de aprovisionamento en orixe cos produtores", afirman.
Tal e como recolleu Unións Agrarias nun comunicado, "a pesar da situación límite na que se atopan as explotacións en Galicia", con subidas na electricidade do 69% e nas facturas da alimentación animal dun 39% respecto ano pasado, Mercadona "segue conxelando o prezo dos seus bricks nos lineais cunha clara estratexia de usar o leite como produto reclamo, o que contraviene totalmente a Lei da Cadea Alimentaria".
"Así, mentres outras cadeas de distribución equilibraron o prezo do cartón de leite coa nova situación de custos dos gandeiros, Mercadona segue forzando prezos anormalmente baixos para mellorar a súa conta de resultados", afirma Unións Agrarias.
O sindicato teme que "esta estratexia, de non ser corrixida" poida "contaxiar ao resto das superficies comerciais para que usen a venda a perdas, alterando gravemente o mercado e toda a cadea de valor do leite".
