Arrinca a vacinación contra o virus do papiloma humano para nenos nados desde xaneiro de 2010
A Consellería de Sanidade indica que aínda non dispón dunha estimación do alcance desta vacina.
Por Europa Press / Redacción | SANTIAGO DE COMPOSTELA | 15/09/2022 | Actualizada ás 13:54
Galicia comeza este xoves a administrar a vacina contra o virus do papiloma humano a nenos nados desde xaneiro de 2010. Ata agora, este tipo de inmunización só a recibían as nenas. O mércores pasado era o propio presidente da Xunta de Galicia, Alfonso Rueda, o que confirmaba a data durante a presentación do novo calendario vacinal no edificio do Sergas en San Lázaro.
Así, os pais poden achegarse desde esta mañá ao centro de saúde que teñan asignado para vacinar aos menores de 12 anos. Con todo, a Consellería de Sanidade, consultada por Europa Press, non dispón aínda dunha estimación do alcance desta vacina. Á do papiloma súmanse ademais a vacina da meninxite B, que se inoculará a partir do 1 de novembro, e a da gripe, que se inxectará ao longo do mes de outubro.
23 MILLÓNS DE EUROS EN 2023
No transcurso da presentación da semana pasada, Alfonso Rueda destacaba o triplo esforzo realizado polo Goberno galego para que Galicia sexa "unha comunidade de referencia en vacinación infantil" e agradecía o traballo da Dirección Xeral de Saúde Pública e dos profesionais sanitarios neste ámbito.
O orzamento do programa galego de vacinación, lembraba, superará en 2023 os 23 millóns de euros, 4,6 millóns máis que en 2022 debido á incorporación destas novas vacinas. O conselleiro de Sanidade, Julio García Comesaña, que tamén participou no acto, destacaba a importancia do novo 'calendario vacinal ao longo de toda a vida', aprobado o pasado xoves polo Consello.
"A partir deste ano, Galicia vai contar cun calendario de vacinación ao longo de toda a vida, un documento integral que supón un cambio na mentalidade sobre a vacinación", destacaba García Comesaña.
