Rueda pide "respecto" para a autonomía galega e insiste en ter as competencias de Costas
Destaca que non se pode tratar a costa galega como se fora a levantina.
Por Europa Press / Redacción | SANTIAGO DE COMPOSTELA | 16/09/2022 | Actualizada ás 13:23
O presidente da Xunta, Alfonso Rueda, ofreceu de novo a súa man tendida para abordar co Goberno a transferencia da xestión da costa ou, polo menos, que "deixe facer" a lei de ordenación do litoral que este xoves anunciou tras o Consello e que xa comezou --por período dun mes-- o trámite de consulta pública.
De feito, a posibilidade de achegar suxestións ou comentarios a esta normativa que nace coa intención de regular a xestión do litoral en Galicia xa está aberto no portal de transparencia do Goberno galego, paso previo á elaboración da norma. A lei, que sustentaría nos informes xurídicos --incluído o do Consello Consultivo-- que afirman que Galicia xa ten de facto as competencias de xestión do litoral na súa carta estatuaria, ten unha vertente "económica, ambiental e social".
"Somos conscientes de que hai que preservar o litoral", manifestou Roda en declaracións aos medios nunha visita na comarca do Salnés, na que lembrou que Galicia é a comunidade con máis quilómetros de costa de todo o Estado e, por tanto, "sabe a riqueza que supón" o litoral.
Rueda, que destacou a boa acollida do sector mar-industria e da oposición para a elaboración da norma e afirmou que "non son de recibo as medidas que se están empezando a implantar" conforme ao regulamento de costas, para o que o Goberno galego anunciou un recurso que seguirá igualmente adiante á marxe da normativa anunciada.
O presidente da Xunta queixouse de que este regulamento pretende "varrer todo o que hai no litoral" e trata igual a costa levantina que a galega, sen ter en conta as características de cada unha. "Miles de postos de traballo e de industrias veríanse condenadas a desaparecer", salientou o mandatario galego.
Por iso, confiou en que "poidan falar" co Executivo central, ou polo menos, que "se respecte a autonomía" de Galicia e se lle deixe " facer unha lei para o coidado" da costa propia.
