O protocolo do SERGAS ante vítimas por submisión química aprobado polo Observatorio Galego de Violencia de Xénero
Tal e como relataron, o documento autonómico parte do elaborado polo Complexo Hospitalario Universitario de Ourense, o primeiro centro en crear unha folla de ruta para este tipo de agresións.
Por Europa Press / Redacción | SANTIAGO DE COMPOSTELA | 06/10/2022 | Actualizada ás 14:36
O Observatorio Galego de Violencia de Xénero aprobou este mércores a última revisión do protocolo elaborado polo Sergas para a atención integral ás vítimas por submisión química. Así o anunciou o director xeral de Asistencia Sanitaria, Jorge Aboal, que compareceu ante a Comisión 5ª de Sanidade, Política Social e Emprego do Parlamento a petición do grupo popular.
Tal e como relataron, o documento autonómico parte do elaborado polo Complexo Hospitalario Universitario de Ourense, o primeiro centro en crear unha folla de ruta para este tipo de agresións.
En base a isto, explica Aboal, elaborouse un documento chamado 'Procedemento de actuación do Sergas ante casos de sospeita de submisión química', "sistematizado e adaptado para poder ser implantado en todas as áreas sanitarias, tamén en atención primaria".
Unha vez elaborado foi remitido, a súa versión inicial, ao Imelga e á xerencia das áreas para a súa consideración. Esta versión foi publicada o 10 de agosto de 2022 na páxina web do Sergas e remitida ás áreas "para o seu coñecemento, traslado e divulgación a todas as categorías profesionais".
Ese mesmo día, a guía e o 'Procedemento de actuación para mulleres vítimas de agresión sexual' foron trasladados á Consellería de Igualdade e ao Observatorio Galego de Violencia de Xénero, tamén para o seu estudo e a presentación de alegacións.
SISTEMATIZACIÓN E COORDINACIÓN
Os obxectivos deste protocolo son, principalmente, establecer procedementos de actuación entre as asistencias sanitarias, o xulgado de garda da área sanitaria e o Imelga "para sistematizar a sospeita, o diagnóstico e o tratamento ás vítimas".
Por outra banda, busca proporcionar "unha estrutura única que coordine as actuacións, mellorando o correcto tratamento da vítima e garantindo os seus dereitos e unha resposta integral".
O protocolo, detallou, define as probas a realizar e como deben facerse; quen e cando pode acompañar á vítima; e como reflectir na historia clínica a declaración. Inclúe ademais a obrigatoriedade de realizar parte de lesións e de envialo ao xuíz de garda, e recolle o acompañamento posterior á exploración --saúde mental e asistencia xurídica, entre outros aspectos--.
Tras varias revisións e achegas, o 3 de outubro a Secretaría xeral de Violencia de Xénero deu traslado da versión final ao Observatorio, que aprobou este mércores o protocolo en Pleno. Aboal destacou que Galicia é a primeira comunidade do servizo sanitario español en pór en marcha un protocolo sistematizado a este respecto.
