Os menores con problemas de saúde mental contarán cunha nova unidade para tratar as súas patoloxías
Será no Hospital Álvaro Cunqueiro de Vigo.
Por Europa Press / Redacción | SANTIAGO DE COMPOSTELA | 17/11/2022 | Actualizada ás 19:39
O Goberno galego analizou na súa reunión deste xoves o informe sobre a licitación da obra da nova Unidade de Hospitalización Infanto Xuvenil de agudos con ingreso no Hospital Álvaro Cunqueiro de Vigo.
Segundo destaca a Xunta, será a segunda de Galicia e duplicará a capacidade de atención do sistema sanitario público galego para dar resposta aos casos que necesiten hospitalización con ingreso por patoloxía psiquiátrica aguda grave.
Esta nova unidade, que se porá en marcha no próximo ano 2023 e que se suma á que está en funcionamento na área de Santiago-O Barbanza, suporá un investimento de 1,5 millóns de euros, e dará asistencia específica aos menores de 16 anos con problemas de saúde mental.
De feito, funcionará como unidade de referencia para todo o sur de Galicia (incluíndo as áreas sanitarias de Vigo, Pontevedra e O Salnés, e a área de Ourense, Verín e O Barco de Valdeorras).
A creación da nova unidade de hospitalización, que contará cunha dotación inicial de 12 profesionais, cuxas prazas están previstas nos orzamentos da Xunta para 2023, enmárcase nos obxectivos do Plan de saúde mental de Galicia 2020-2024. Ocupará unha superficie de 740 metros cadrados no hospital vigués. No ámbito da saúde, o Goberno galego autorizou este xoves a compra centralizada de gasas e compresas de algodón para as áreas sanitarias por importe de máis de 6 millóns de euros.
