Ethel Vázquez: "Incentivar descontos do ferrocarril esquecendo os autobuses supón profundar nun desequilibrio territorial"
Por Europa Press / Redacción | LUGO | 26/11/2022 | Actualizada ás 18:15
A conselleira de Infraestruturas e Mobilidade, Ethel Vázquez, instou ao Goberno central a "apostar" polo equilibrio territorial e manter en 2023 os descontos nos billetes de autobús, da mesma forma que o fará co ferrocarril.
Vázquez Mourelle expresouse así este sábado en Lugo, onde participou na clausura da Asemblea Xeral da Federación Galega de Asociacións de Transporte de Viaxeiros en Autocar.
"O ferrocarril é un medio de transporte esencial para Galicia, que necesita servizos competitivos e de calidade, pero só mediante a combinación co autobús se poderá garantir o dereito á mobilidade dos galegos, vivan onde vivan", afirmou.
Así, detallou, incentivar con descontos e bonos gratis o uso do ferrocarril, "esquecendo os autobuses", supón "profundar" nun desequilibrio territorial no que Galicia "adoita saír perdendo".
A conselleira tamén agradeceu ao sector do autobús, en nome da Xunta, o seu esforzo por manter os servizos públicos "a pesar da prolongada caída de viaxeiros pola pandemia".
Nesta liña, lembrou que a Administración galega destinou 28 millóns de euros a "garantir a viabilidade das concesións de transporte fronte á crise de viaxeiros causada pola Covid", ou 3,5 millóns de euros a compensar o incremento de gastos derivado do aumento do custo dos combustibles.
Ademais de todo isto, sinalou que a Xunta implantou dende o 1 de setembro un desconto do 50 % no prezo dos billetes de autobús interurbano, "polo que aínda non recibiu nin un euro do Goberno de España".
A responsable de Mobilidade confirmou que a Xunta continuará apostando con determinación polo transporte público, "por iso os Orzamentos prevén máis de 90 millóns de euros, financiando o 76 % do custo do billete aos usuarios, que só deben achegar un 24 %, e o 0 % no caso dos menores de 21".
Nesta liña, lembrou que o Goberno galego renovou todas as concesións de autobús interurbano, "pondo a disposición dos galegos máis de 3.500 liñas de autobús que multiplicaron a cobertura".
Sobre isto destacou que se conseguiu levar o autobús "onde antes non chegaba", como no caso da provincia de Lugo, onde a cifra de liñas multiplicouse por seis.
