"Miña querida Sherezade" de Andrea Maceiras, en breve nas librerías

Miña querida Sherezade, 6.º Premio Meiga Moira de Literatura Infantil-Xuvenil da escritora coruñesa Andrea Maceiras, é unha proposta da herculina Baía Editorial para lectoras e lectores a partir de 12 anos que se lanzará nos vindeiros días.

Andrea Maceiras é autora de varios éxitos da literatura infantil en galego, como Violeta tamurana e O segredo do lagarto arnal.  As historias d’As mil e unha noites son a base dun texto que xera repetidas e novidosas narracións por volta da ficción e doutras realidades literarias. Para a editorial a nova obra "acaba por ser unha exacta e plural homenaxe ao libro e á lectura". 

Andrea Maceiras Lafuente (A Coruña, 1987) é licenciada en Filoloxía Galega e Hispánica. No eido do relato curto obtivo en varias ocasións o primeiro premio do Certame Literario do Concello de Cambre nas modalidades de narrativa e poesía, así como o segundo premio do X Certame Literario de Relatos Curtos ‘Os Viaductos’ do Concello de Redondela polo seu relato “Cando foi a última vez que pasou fame de verdade?”.

No 2010 queda finalista do VI Premio de Novela Biblos-Pazos de Galicia. Nese mesmo ano gaña o 4º Premio Meiga Moira coa súa obra “Violeta Tamurana” (Baía Edicións, 2010), que tamén queda finalista do Premio da Edición 2010 e do Premio Frei Martín Sarmiento 2011. Con “Nubes de evolución” (Xerais, 2013) quedou finalista do Premio Fundación Nova Caixa Galicia 2011 e gañadora do Premio Fervenzas Literarias, 2014. Con “Volverás, golfiño” (Xerais, 2014) quedou finalista do Premio Merlín, 2013.