O PP de Pontevedra quere competir con Vigo para facer "unha enorme cidade do Nadal"
Por Europa Press / Redacción | PONTEVEDRA | 14/12/2022 | Actualizada ás 14:43
O portavoz do grupo municipal do Partido Popular de Pontevedra e candidato desta formación á Alcaldía, Rafa Domínguez, presentou este mércores o "ambicioso plan" dos populares para o próximo Nadal se conseguen gobernar neste municipio, tras a polémica polo aceso das luces este ano na cidade do Lérez --por protestas de comerciantes por non facerse como mínimo na ponte de decembro--.
"A iluminación funcionará desde o venres día 2 de decembro", apuntou Rafa Domínguez nunha comparecencia ante os medios de comunicación na que estivo acompañado da concelleira Pepa Pardo, e na que tamén comprometeu instalar atraccións de feira e un poboado do Nadal na capital da provincia, a poucos quilómetros da cidade de Vigo --cuxo alcalde, Abel Caballero, fixo do Nadal uno dos 'símbolos' da cidade--.
"Cremos que o Nadal debe chegar antes a Pontevedra, debe ser máis elegante, con elementos diferenciadores que poidan facer que a xente se achegue á nosa cidade", sinalou Domínguez. "Faremos un esforzo significativo na decoración de todas as parroquias e barrios, que ata agora foi inexistente ou mediocre", apostilou.
O PP de Pontevedra propón a creación de "elementos distintivos", por exemplo, "unha enorme cidade do Nadal", que inclúa "un gran mercado no que poidan participar tanto o comercio local como a hostalaría", ademais de postos de decoración.
O candidato do Partido Popular tamén quere que se instale "unha casa para que Papá Noel poida recibir aos nenos" e para que, xusto despois, os Reis Meigos poidan facer o mesmo. "Será un polo de atracción importante", destacou o popular. Tamén instalarán caixas de correos para enviar cartas a Melchor, Gaspar e Baltasar.
