O alcalde de Ferrol: "Non vou permitir que Augas de Galicia asuma a xestión do saneamento"

O alcalde de Ferrol, Ángel Mato (PSOE), asegurou este martes que non vai "permitir que a Xunta lle entregue o sistema de saneamento a unha empresa privada para que acabe saíndo máis caro aos ferroláns porque así o queira Augas de Galicia". Así o explicou tras ter coñecemento de que Augas de Galicia, dependente da Xunta, asegurou que vai "asumir" a xestión do saneamento na zona norte da ría de Ferrol, que afecta os concellos da cidade departamental e Narón, ante as discrepancias dos gobernos de ambos os municipios.

Segundo Mato, "todo o mundo sabe que Augas de Galicia non opera depuradoras" e que "o que fai é abrir licitacións para entregarllas a empresas completamente privadas".

O rexedor socialista lembrou que o saneamento "é unha competencia municipal e o Concello de Ferrol ten o medio propio para prestar esa competencia", en alusión á empresa mixta de augas de Ferrol (Emafesa), na que a Administración local posúe unha participación do 51%.

Segundo Mato, a auditoría que realizou Augas de Galicia sobre o sistema de depuración "deixou moi claras dúas cousas, que a día de hoxe Emafesa realiza o traballo de depuración e que o fai a un prezo correcto".

Ante iso, o alcalde trasladou que "o goberno local de Ferrol vai defender que a depuración se preste a través da empresa na que o Concello ten a participación maioritaria. "De adoptar unha decisión semellante, de querer quitarlle a competencia a Ferrol, Augas de Galicia tería que aterse ás consecuencias, que non serían poucas", advertiu Matogueira.

En relación á intención de recuperar a xestión, alegando unha falta de acordo entre Ferrol e Narón, asegurou que "cando hai unha falta de pagamento, reclámase, como fixo o Concello de Ferrol, e trátase, simplemente, de que cada un pague o que lle corresponde". O alcalde afirmou que, "tal como determinou o propio organismo Augas de Galicia na súa auditoría, Narón non está a pagar o que lle corresponde, que sería cando menos o 40%".

RESPOSTA DESDE NARÓN

Desde o Concello de Narón, a súa alcaldesa, Marián Ferreiro (TEGA), asegurou que o anuncio de Augas de Galicia "supón unha boa noticia" e algo que xa se demandara desde o concello.

Ferreiro apuntou que ela era coñecedora, "porque así o comunicaron desde Augas de Galicia", de que se estaba realizando unha auditoria para "ao fin sacar a licitación a xestión desta infraestrutura".

Así, segundo a rexedora naronesa, que lembrou que o seu concello nunca se negou a "pagar", o custo reclamado por Ferrol non é o correcto. "A licitación que vai realizar a Xunta entendo que é beneficioso para os dous concellos, porque estimamos que así se abaratarán custos, ao concorrer ao concurso varias empresas, co cal entendemos que sempre será mais económico", resolveu.

AUGAS DE GALICIA

A través dun comunicado, Augas de Galicia lembrou que o saneamento o realiza Emafesa, "por un convenio que está en vigor ata finais de 2023", polo que "ambos os municipios teñen máis dun ano por diante para chegar a un acordo sobre a fórmula de xestión do sistema.

Se este acordo non se materializa, "a alternativa final sería que Augas de Galicia realizase as actuacións necesarias para asumir a súa responsabilidade. De acordo co establecido na Lei de Augas para as infraestruturas declaradas de Interese Xeral, a Xunta deberá asumir a responsabilidade". Para ter información directa sobre o funcionamento do sistema, Augas de Galicia "está actualmente realizando unha auditoría", que "sería de utilidade no caso de ser necesario licitar un contrato de explotación".