O outro Nadal: pensionistas, traballadores no límite e parados que piden axuda
Crecen os doantes aos bancos de alimentos, aínda que a crise reduce a achega individual. Tamén soben as persoas con traballo precario ou con pensión de invalidez que non chegan a fin de mes.
Por Europa Press / Redacción | SANTIAGO DE COMPOSTELA | 24/12/2022 | Actualizada ás 14:00
Os Bancos de Alimentos do catro provincias galegas destacan o éxito da 'Gran Recollida' de produtos efectuada nas últimas datas e que foron, recoñecen, segundo o previsto. No entanto, precisan que a crise pola subida da luz e dos prezos fai que persoas que antes doaban máis agora acheguen menos cantidade, o que se suple coa solidaridd doutras e de entidades.
En declaracións a Europa Press, Conchi Rei, presidenta do Banco de Alimentos Rías Altas -- que atende á provincia da Coruña-- cifrou, entre doazóns económicas e de alimentos, nuns 350.000 quilos o recollido. "Era a meta que tiñamos".
"A xente doa menos porque economicamente non o pode afrontar igual que antes, pero están a doar máis persoas", sinala. "Antes alguén che daba catro quilos --de alimentos-- agora dánche dous ou un", explica. Mentres, apunta a unha maior demanda por parte das entidades ás que distribúen polo que incide na necesidade de manter e impulsar as campañas cos supermercados e grandes superficies xa que os produtos da 'Gran Recollida' "poden durar tres ou catro meses".
PERFIL DO DEMANDANTE
Respecto ao perfil do demandante, afirma que xa antes da pandemia situouse en persoas de "clase media baixa". "Matrimonio con dous fillos ou tres, no que traballa un nun traballo máis ou menos precario", asegura en referencia a unhas persoas cuns ingresos de "800 ou 900 euros" que, engade, "non lles chega" tras pagar os recibos. "Ou pagas todo iso ou comes". A este perfil, suma o dunha muller soa con nenos e outro "do que ninguén fala".
"As persoas que cobran unha pensión de invalidez, que son pensións rídiculas, ás veces 400 euros ou 500 euros". "E esa xente que traballou toda a súa vida en algo e agora non pode traballar", apostila.
ALIMENTOS PARA O PRIMEIRO TRIMESTRE
Na mesma liña, Iván Martínez, presidente do Banco de Alimentos de Vigo, que atende a provincia de Pontevedra, destaca o resultado da 'Gran Recollida' deste ano, cifrando en 350.000 os quilos de alimentos recadados nos 135 supermercados desta provincia e con presenza duns 2.000 voluntarios e voluntarias.
Coincide, por outra banda, en que "a situación máis que complexa das familias está a levar a que persoas que nunca necesitaran axuda do Banco de Alimentos, agora estean a ser atendidos por nós". "Nos fogares priorízase o pago do aluguer ou a hipoteca, así como os gastos fixos, e, despois, cando teñen que comprar alimentos directamente non chegan e, aí, estamos nós".
TRABALLADORES EMPOBRECIDOS
"Calquera persoa pode converterse en beneficiario porque a súa situación económica xa estaba moi axustada e, agora, directamente, xa non chega a fin de mes". "Tamén, dun tempo para acó, estamos a axudar a traballadores empobrecidos, é dicir, persoas que, aínda tendo un emprego, a súa precariedade non lle permite sobrevivir economicamente", recalca.
Como os anteriores, Amadora Núñez, presidenta de Banco de Alimentos de Lugo, resalta que a 'Gran Recollida' "funcionou moi ben" coa obtención de 150 toneladas de produtos no seu caso. "Pedimos arroz, pasta, fariña, azucre, lentellas, aceite de girasol", cita como exemplos aos que suma o leite xa proporcionado polas empresas lácteas.
