Axudas de ata 200.000 euros por proxecto para a mellora das termas de uso lúdico galegas

A Xunta de Galicia activará este 2023 a segunda edición do programa de axudas para a mellora de espazos termais de uso lúdico en Galicia. Unha convocatoria plurianual (2023 e 2024) para a que reservarán un total de 1,74 millóns de euros.

Segundo explica o Goberno autonómico nun comunicado, os apoios serán de concorrencia non competitiva e publicaranse no Diario Oficial de Galicia (DOG) nas próximas semanas "para fomentar a actividade termal mediante a realización de actuacións encamiñadas ao acondicionamento destas instalacións".

As melloras inclúen a adquisición e instalación de caudalímetros, sistemas de bombeo ou equipos de medición; colocación de sinalización; canalización de auga; mellora de espazos verdes, instalacións lúdicas e condicións de accesibilidade e seguridade; así como actuacións en vestiarios, duchas e aseos.

Poderán optar ás axudas as entidades locais galegas que conten co título habilitante para o aproveitamento lúdico de augas termais. A intensidade da axuda manterase no 80 % pero o importe máximo incrementarase ata os 200.000 euros (fronte aos 150.000 da primeira edición).

Termas en Ourense | Fonte: Arquivo