O PSdeG insta a Rueda a asumir "en primeira persoa" as negociacións para resolver a crise do Sergas
Os socialistas consideran que o conselleiro de Sanidade e o seu equipo "non son capaces" de facelo.
Por Europa Press / Redacción | SANTIAGO DE COMPOSTELA | 09/01/2023 | Actualizada ás 15:20
O portavoz do PSdeG-PSOE no Parlamento de Galicia, Luís Álvarez, instou este luns ao presidente da Xunta, Alfonso Rueda, a que asuma el "en primeira persoa, de forma directa e sen ningún tipo de reticencias" as negociacións para solucionar os problemas que afronta o Servizo Galego de Saúde (Sergas).
"Se o conselleiro de Sanidade (Julio García Comesaña) e o seu equipo non son capaces de resolver os problemas na sanidade pública, que sexa o presidente da Xunta quen o asuma en primeira persoa", insistiu o dirixente socialista.
Álvarez, na súa habitual rolda de prensa dos luns, mencionou o comunicado emitido o domingo por médicos do Hospital Montecelo de Pontevedra, que advertía dunha "saturación" das Urxencias ante a ausencia de facultativos nos puntos de atención continuada (PAC) do Grove, Caldas, Baltar (Sanxenxo), e Bueu, entre outros afectados esta fin de semana.
A xuízo do portavoz do PSdeG, isto demostra a "incapacidade" do actual equipo da Consellería de Sanidade e lamentou que a resposta do seu titular sexa dicir "falsidades" e culpar ao Goberno central.
Neste contexto, Luís Álvarez lembrou que a Xunta deixou sen convocar neste curso 2022-2023 un total de 105 prazas MIR. No caso da especialidade de Medicina Familiar e Comunitaria, cifrou en 180 as vacantes non convocadas desde o ano 2010.
"Terán consecuencias nos próximos anos", advertiu, xa en referencia ao que ocorreu a pasada fin de semana na área de Pontevedra-O Salnés.
Isto súmase ao ocorrido en Fin de Ano, cando o PAC da Parda e Baltar, en Pontevedra e Sanxenxo, quedaron sen médicos e tiveron que estar atendidos por equipos externos ao Sergas que non puideron acceder á historia clínica dos pacientes.
Ademais, o socialista denunciou a situación do servizo de ambulancias, que a Xunta concede a propostas empresariais "en baixa temeraria" e que deriva nunha "deficiente" prestación do servizo que mesmo "vulnera os dereitos dos seus traballadores".
Ante toda esta situación, o PSdeG xa solicitou tempo atrás cesamentos nos xerentes das áreas sanitarias e outras medidas. "Pero non se produciu nada nestas semanas", lamentou o seu portavoz parlamentario, polo que agora debe ser o presidente da Xunta quen "asuma en primeira persoa" este problema.
