Entidades en defensa do galego, eúscaro e catalán renderán tributo a Castelao e Rosalía pola súa "reivindicación do galego"

Será o 22 de xaneiro en Santiago

Por Europa Press / Redacción | SANTIAGO DE COMPOSTELA | 10/01/2023 | Actualizada ás 10:14

Comparte esta noticia

Entidades sociais en defensa do galego, o eúscaro e o catalán participarán o vindeiro domingo 22 de xaneiro nun acto homenaxe ás figuras de Castelao e Rosalía de Castro en Santiago de Compostela.

O acto, que se celebrará no Panteón de Galegos Ilustres de San Domingos de Bonaval --onde descansan os restos dos dous autores--, está organizado pola Mesa pola Normalización Lingüística, que convidou a Euskalgintzaren Kontseilua e á Plataforma per a Llengua.

As organizacións pretenden enxalzar "o valor referencial que teñen Rosalía e Castelao, cada un no seu tempo, na reivindicación da normalización da lingua galega e, por extensión, de todas as linguas propias dos seus países, cun legado que permanece vivo na actualidade a través do activismo".

Por iso, elixiron o día 22 para este acto por tratarse dunha data que ten lugar ás portas do 29 de xaneiro, día do nacemento en 1886 de Castelao, e do 23 de febreiro, no que se cumprirán 186 anos do de Rosalía de Castro.

Ademais, segundo explica nun comunicado A Mesa, en 2023 celébrase o centenario do primeiro 'Galeusca', nome que reciben os pactos subscritos entre entidades de Galicia, Euskadi e Cataluña, polo que apelan a continuar estreitando lazos.

Cartel do acto organizado o 22 de xaneiro pola Mesa pola Normalización Lingüística. A MESA
Cartel do acto organizado o 22 de xaneiro pola Mesa pola Normalización Lingüística. A MESA | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta